Adolat qabulxonasi — Adolatli yechim maskani

Muqaddas hadisi shariflarimizda choʻkayotgan insonni qutqarmoq savobi, miskin odamni koʻnglini olmoqlikning ajri ulugʻligi haqidagi hikmatlarni ko’p oʻqiganmiz. Zero, mamlakatimizda inson qadrini ulugʻlashga qaratilgan odilona siyosat tufayli ehtiyojmand, kam taʼminlangan oilalar, nogironligi boʻlgan insonlarning ijtimoiy himoyasi borasida keng koʻlamdagi saʼy-harakatlarga guvohmiz.

“Adolat” SDP ham oʻz elektorati manfaatlaridan kelib chiqib, ularning haq-huquqlarini himoya qilish maqsadida joylarda “Adolat qabulxonalari” tashkil etgan. Ushbu qabulxonalarga aholining turli qatlamlaridan murojaatlar kelib tushadi. Ushbu murojaatlar tuman-shahar partiya tashkiloti raislari, mahalliy Kengash deputatlari hamda sohaga daxldor tashkilot vakillari ishtirokida atroflicha oʻrganilib, murojaatlarning ijobiy yechimini topishda zaruriy choralarni koʻrib boriladi.

Joriy yilning oʻtgan 6 oyi mobaynida mazkur qabulxonalarga jami 54 nafar fuqarolardan murojaatlar kelib tushgan boʻlib, ularning 34 tasi ijtimoiy himoya, 7 tasi ishga joylashtirish, 4 tasi fuqarolarning buzilgan huquqlari tiklash va 9 tasi boshqa masalalarga oiddir. Kelib tushgan murojaatlarning barchasi ijobiy hal etilgan.

“Adolat” SDP Uchkoʻprik tuman Kengashi raisi Adinaxon Hakimova qisqa davr mobaynida 18 nafar fuqarolarning murojaatlarini ijobiy hal etishga muvaffaq boʻlgan.

Misol uchun, tumandagi Uzumzor koʻchasi, 25-uyda istiqomat qiluvchi Oʻgʻilxon Mamajonova yurak yetishmovchiligi kasalligi bilan ikkinchi guruh nogironligi roʻyxatida turishi, jarrohlik amaliyoti uchun mablagʻ masalasida amaliy yordam soʻrab murojaat qiladi. Murojaat yuzasidan tuman partiya Kengashi raisi A.Xakimova hamda tuman deputati L.Turanovlar ushbu murojaatni atroflicha oʻrganib chiqadilar. “Saxovat va koʻmak” jamgʻarmasi rahbari B.Davronovga Deputat soʻrovi yuborilib, jamgʻarma fondidan 2 000 000 soʻm mablagʻ fuqaroning jarrohlik amaliyoti uchun ajratiladi.

Bundan tashqari, Fargʻona tumanidagi Mozortagi MFY, Saxovat koʻchasida istiqomat qiluvchi Xosiyatxon Qosimova Parkinson kasalligi bilan kasallanadi. Sogʻligʻini tiklash maqsadida moddiy yordam olish boʻyicha “Adolat” SDP Fargʻona tuman Kengashi deputatlik guruhi aʼzolari F.S.Mirzayev, O.A.Dadajonovalarga qilgan murojaati deputatlar tomonidan atroflicha oʻrganiladi va Deputat soʻroviga asosan, tuman sessiyasi qarori bilan kasallikni davolashga ixtisoslashgan shifoxonaning hisob raqamiga 11 575 000 soʻm mablagʻ oʻtkazib berilib, muammo ijobiy hal etiladi.

Yana bir murojaat joriy yilning 5-may kuni Qoʻqon shahar Isfara guzari MFY, A. Umarxon koʻchasi, 68-uyda yashovchi fuqaro Yoqutxon Alimatovadan kelib tushadi. Boquvchisini yoʻqotgan, ikki nafar farzandi bilan yolgʻiz yashab kelayotgan Y.Alimatova doimiy ish oʻrniga ega boʻlish maqsadida “Adolat” SDP Qoʻqon shahar Kengashiga murojaat qiladi. Mazkur murojaat Qoʻqon shahar Kengashi raisi A.Ahmadjonov tomonidan oʻrganilib, fuqaro “Zolotaya korona” xususiy korxonasiga ishga joylashtiriladi.

Oila birdamligi va hamjihatligini mustahkamlashda “Adolat” SDP oʻz oldiga bir qator chora-tadbirlarni ishlab chiqqan. Partiya faollari tomonidan oilaviy ajrimlar bilan bogʻliq murojaatlar hamkor tashkilotlar bilan birgalikda oʻrganilib, koʻplab ajrim yoqasiga kelib qolgan oilalar saqlab qolinmoqda.

Misol uchun, Rishton tumanida istiqomat qiluvchi F.T.ning oilaviy masalalariga qaynonasi tomonidan muntazam ravishda aralashuvi natijasida oilaviy rishtalariga darz ketayotganligi farzandlari esa, tirik yetim boʻlib qolishidan xavotirga tushib, “Adolat qabulxonasi”ga murojaat qiladi. Fuqaroning murojaati tuman Tuman partiya tashkiloti raisi Y.Solijonova hamda mahalla xotin- qizlar faoli M.Bekmirzayevalar ishtirokida oʻrganildi. Olib borilgan chora-tadbirlar natijasida kelin-qaynana munosabatlari ijobiy yoʻlga qoʻyilib, oila saqlab qolinadi.

Fargʻona tumanidagi Yangiobod MFY, Dorilfunun koʻchasidagi 56-sonli umumtaʼlim maktabi katta yoʻl yoqasida joylashgan. Maktab oʻqituvchilari va ota- onalar nomidan yoʻllangan murojaatda maktab yoʻl yoqasiga svetofor oʻrnatilishida yordam soʻralgan. “Adolat” SDP Fargʻona tuman Kengashi deputatlik guruhi aʼzosi A.Erkaboev tashabbusi va xayriya mablagʻlari hisobidan ushbu maktab uchun svetofor oʻrnatiladi.

Partiya tomonidan amalga oshirilgan xayrli tadbirlar mahalliy aholini partiyaga boʻlgan ishonchini va hurmatini yanada oshiradi. Ana shu ishonch va eʼtibor esa partiyadoshlarimizni hamisha xalq bilan, xalq orasida boʻlishlariga undayveradi.

                                              Dilnoza Ermatova,

          “Adolat” SDP Fargʻona viloyat Kengashi mutaxassisi.