“Adolat” SDPda Yoshlar parlamentiga saylovning Respublika bosqichi boʻlib oʻtmoqda

Bugun Oʻzbekiston “Adolat” sotsial-demokratik partiyasi Siyosiy Kengashi Markaziy apparatida “Yoshlar parlamenti”ga oʻtkazilayotgan saylovning respublika bosqichi oʻz ishini boshladi.

Aytish joizki, Oʻzbekiston Respublikasi Oliy Majlisi Qonunchilik palatasi huzuridagi “Yoshlar parlamenti” bugun tom maʼnoda ijtimoiy-iqtisodiy, siyosiy-huquqiy jarayonlarda yoshlarning ishtirokini taʼminlashga qaratilgan fuqarolik jamiyatining muhim tarkibiy qismiga aylanmoqda.

Belgilangan rejaga koʻra, 17, 20 hamda 21-fevral kunlari uch qismda boʻlib oʻtadigan ayni saylovning respublika bosqichi oʻta qizgʻin ruhda boshlandi.

Unda Oʻzbekiston Respublikasi Oliy Majlisi Qonunchilik palatasi hamda hududiy Kengash deputatlari, partiya Siyosiy Kengashi rahbariyati va aʼzolari, partiyaning Markaziy apparati xodimlari, shuningdek, Oʻzbekiston Respublikasi Yoshlar ishlari agentligi mutasaddilaridan iborat tarkibdagi hakamlar hayʼati nomzodlar hujjatlari va saylovoldi dasturlarini sinchkovlik bilan oʻrganib chiqdi.

Hakamlar poytaxtdan olis hududlarda yashovchi nomzodlar bilan ZOOM platformasi orqali onlayn tarzda bevosita suhbatlar ham olib bordi. 

Jarayonda 18 yoshdan 30 yoshgacha boʻlgan nomzodlarning qonunchilik sohasidagi bilim va tajribasi, qonunchilikni takomillashtirish boʻyicha asoslantirilgan takliflari, partiya faoliyatidagi faolligi, oʻz ortidan yoshlarni ergashtira olish salohiyati, davlat boshqaruviga oid bilimi, jamiyatimizda amalga oshirilayotgan islohotlarga doir qarashlari alohida inobatga olindi.

Saylovning bugungi, dastlabki qismida Qoraqalpogʻiston Respublikasi, Andijon, Namangan hamda Navoiy viloyatlaridan 18 nafar nomzod ishtirok etdi. 

Saylovning ikkinchi va uchinchi qismida Buxoro, Samarqand, Sirdaryo, Surxondaryo, Fargʻona, Xorazm, Qashqadaryo, Toshkent viloyatlari hamda Toshkent shahridan yosh nomzodlarning salohiyati sinovdan oʻtkaziladi.

Mazkur jarayonlar yakunida, saylov Nizomida belgilangan talablarga koʻra, saylov hayʼati tomonidan Oʻzbekiston “Adolat” SDPdan Oʻzbekiston Respublikasi Oliy Majlisi Qonunchilik palatasi deputatligiga boʻlib oʻtgan saylovda egallagan oʻrniga mos ravishda, “Yoshlar parlamenti”ga munosib 24 nafar nomzodni ochiq ovoz berish yoʻli orqali saylash nazarda tutilgan.

O'zbekiston "Adolat" SDP
Matbuot xizmati