“Adolat” SDPdan Prezidentlikka nomzod Robaxon Maxmudova saylovchilar bilan uchrashuvini Toshkent shahridan boshladi

Bugun “Adolat” sotsial-demokratik partiyasi tomonidan Prezidentlikka nomzod sifatida koʻrsatilgan Robaxon Maxmudovaning saylovchilar bilan ilk uchrashuvi boʻlib oʻtdi. Toshkent davlat yuridik universitetida tashkil etilgan uchrashuvda Oliy Majlis Qonunchilik palatasi deputatlari, partiya faollari, oliy oʻquv yurtining professor-oʻqituvchilari, talaba-yoshlar, keng jamoatchilik va OAV vakillari ishtirok etishdi.

 

Uchrashuvda Oʻzbekiston Respublikasi Prezidentligiga nomzod R.Maxmudova soʻzga chiqib, oʻz saylovoldi dasturining asosiy yoʻnalishlari bilan saylovchilarni tanishtirib oʻtdi.

 

Nomzodning Saylovoldi dasturida Vatanimiz taraqqiyoti yoʻlida huquqiy demokratik, ijtimoiy davlat va barcha uchun farovonlik taʼminlangan adolatli fuqarolik jamiyati qurishning sotsial-demokratik modeli taklif etilayotganligi taʼkidlandi.

 

Qolaversa, nomzod dasturida inson, uning huquqlari, erkinliklari va qonuniy manfaatlari davlat va jamiyatning eng yuksak qadriyatlari ekanligi tan olinib, jamiyat va davlat hayotining barcha jabhalarida har bir insonning farovon hayot kechirishi uchun zarur shart-sharoitlar yaratish, ijtimoiy adolat va qonun ustuvorligini taʼminlash, Oʻzbekis­tonning erkinlik, adolatlilik, birdamlik, ijtimoiy himoya va masʼuliyat tamoyillari hukmronlik qiladigan, insonlarning keskin tabaqalanishiga yoʻl qoʻyilmaydigan kuchli ijtimoiy davlat sifatida, aholining yuqori turmush darajasiga ega rivojlangan davlatlar qatoriga qoʻshilishiga erishish kabi vazifa va maqsadlarga alohida eʼtibor qaratilgan.

Bundan tashqari, dasturda xalq davlat hokimiyatining birdan-bir manbai ekanligi haqidagi konstitutsiyaviy prinsip davlat siyo­satining ustuvor yoʻnalishi sifatida taʼkidlanib, xalq hokimiyatining yorqin timsoli boʻlmish vakillik demokratiya­­si institutining roli va ahamiyatini yanada oshirish, mamlakat iqtisodiyotining barqaror rivojlanishini taʼminlash, jamiyatning innovatsion, intellektual salohiyatini roʻyobga chiqarish va inson kapitalini rivojlantirish kabi masalalarga alohida eʼtibor qaratilganligi tadbir ishtirokchilarida katta qiziqish uygʻotdi.

Shuningdek, uchrashuv davomida nomzodning Toshkent shahridagi ishonchli vakili Sobir Tursunov, Xalq deputatlari Shayxontohur tuman Kengashi deputati, Shayxontohur tumanidagi 192-umumiy oʻrta taʼlim maktabi direktori Dildora Islomova hamda Xalq deputatlari Toshkent shahar Kengashi deputati Toshpoʻlat Matibayevlar soʻz olib, Prezidentlikka nomzod Robaxon Maxmudovaning Saylovoldi dasturi xalqchil, yurtparvar gʻoya va maqsadlar jamlanmasi ekanligini eʼtirof etish barobarida, yigʻilganlarni kutilayotgan muhim siyosiy, tarixiy tadbirda Robaxon Maxmudovaga ovoz berishga chaqirishdi.

Konstruktiv ruhda, qizgʻin savol-javoblarga boy boʻlgan uchrashuv soʻnggida tadbir ishtirokchilari yurt ravnaqi, fuqarolar farovonligini taʼminlovchi muhim siyosiy tadbirlarda faol ishtirok etishlarini bildirishdi.

Oʻzbekiston Respublikasi Prezidentligiga nomzod Robaxon Maxmudovaning saylovchilar bilan uchrashuvlari davom etadi.

“Adolat” SDP Matbuot xizmati.