Joriy yilning 24 mart kuni Abu Rayhon Beruniy nomidagi Sharqshunoslik instituti majlislar zalida O‘zbekiston “Adolat” sotsial-demokratik partiyasi Siyosiy Kengashining X Plenumi bo‘lib o‘tdi.

Plenumda O‘zbekiston “Adolat” SDP Siyosiy Kengashi Ijroiya Qo‘mitasining 2022 yildagi faoliyati yuzasidan hisoboti va 2022-2026 yillarga mo‘ljallangan Yangi O‘zbekistonning taraqqiyot strategiyasini “Insonga eʼtibor va sifatli taʼlim yili”da amalga oshirishga oid davlat dasturidan kelib chiqadigan 2023 yildagi ustuvor vazifalar, shuningdek, partiyaning “O‘zbekiston Respublikasi Konstitutsiyasi to‘g‘risida”gi O‘zbekiston Respublikasi Konstitutsiyaviy qonuni loyihasi bo‘yicha O‘zbekiston Respublikasi referendumidagi ishtirokiga oid masalalar ko‘rib chiqildi.

Mazkur tadbirda partiya Siyosiy Kengashi hamda Oliy Majlis Qonunchilik palatasidagi fraksiyasi aʼzolari, hududiy partiya kengashlari va xalq deputatlari mahalliy Kengashlaridagi deputatlik guruhlari rahbarlari, partiya ekspertlari, faollar hamda OAV vakillari ishtirok etishdi.

Tanqidiy va tahliliy ruhda o‘tgan tadbirda partiya Siyosiy Kengashi raisi Bahrom Abduhalimov maʼruza qildi.

Taʼkidlanganidek, O‘zbekiston “Adolat” SDP 2022 yilda partiyaning dasturiy vazifalarini amalga oshirishga qaratilgan loyihalarni amalga oshirishda, partiya elektorati va aholining keng qatlami bilan yuzma-yuz muloqotlar tashkil qilib, ularni qiynayotgan, jamiyat rivojiga to‘siq bo‘layotgan muammolarni bartaraf etish bo‘yicha takliflar ishlab chiqishda, barcha darajadagi deputatlik korpuslarining hamkorligini tizimli yo‘lga qo‘ydi. Bunda ayniqsa “Fraksiya – markaz – viloyat – tuman” konsepsiyasi o‘zining ijobiy samarasini berdi.

Shu bilan birga, partiya aʼzolari safini kengaytirish, boshlang‘ich partiya tashkilotlari faoliyatini kuchaytirish, kadrlar zaxirasini mustahkamlash, aʼzolik badallari tushumini tizimli yo‘lga qo‘yish va to‘liq taʼminlash, partiya faollarining siyosiy bilimlari va faolligini oshirishga ham alohida eʼtibor qaratildi.

Hisobot davrida partiya aʼzolari soni 46 343 nafarga ko‘payib, umumiy aʼzolar soni 563 549 nafarni, boshlang‘ich partiya tashkilotlari soni esa
6 866 tani tashkil qildi.

Hisobot yilida 8910 ta turli mavzulardagi tadbirlar o‘tkazilib, tadbirlarda jami 310720 nafar ishtirokchi qatnashdi.

Xususan, mafkuraviy va dasturiy vazifalarni amalga oshirishga qaratilgan 10 dan ortiq partiya loyihalari hayotga samarali tatbiq etildi.

Jumladan, xalq bilan yuzma-yuz muloqot o‘rnatish maqsadida partiyaning
“Muammo bilan yuzma-yuz” loyihasi doirasida barcha darajadagi deputatlik korpuslari ishtirokida joylarga qonunlarning yetib borishi va ularning ijrosini o‘rganish, mavjud muammolarni bartaraf etish choralarini ko‘rish bo‘yicha tegishli davlat organlariga takliflar kiritish orqali qonun ustuvorligini taʼminlashga qaratilgan amaliy ishlar belgilandi. Partiyaning barcha tuman, shahar Kengashlarida partiya faollari va deputatlardan iborat ishchi guruhlari tuzilib, har haftaning chorshanba kunlari muntazam ravishda joylarda “mahallabay” va “fuqarobay” tarzda xalq bilan yuzma-yuz muloqotlar o‘rnatildi.

O‘tgan bir yil davomida ishchi guruhlar tomonidan Respublika bo‘yicha 4710 ta mahallalarda xalq bilan yuzma-yuz muloqotlar tashkil qilindi. Ularda 48782 ta xonadon va 3176 ta xo‘jalik yurituvchi subyektga tashrif buyurildi. Partiyaning barcha tizimlariga aholining 11200 ta murojaatlari kelib tushgan. Ushbu murojaatlar yuzasidan 4077 dan ortiq deputatlik so‘rovlari yuborilib, ularning 3500 dan  ortig‘i o‘z ijobiy yechimini topdi. 7123 dan ortiq murojaatlar esa huquqiy maslahatlar berish orqali hal etildi.

Haftaning har seshanba kuni O‘zbekiston “Adolat” SDP lektorlarning aholiga mamlakatimiz va xorijda ro‘y bergan eng muhim voqea-hodisalar va hukumatimiz tomonidan qabul qilingan normativ-huquqiy hujjatlarning mazmun-mohiyatini keng miqyosda tushuntirish va aholining siyosiy savodxonligini oshirib borish maqsadida “Siyosiy-huquqiy bilimlarni mustahkamlash – demokratik jamiyat poydevori” loyihasi o‘tkazib kelinmoqda.

O‘tgan 2022 yil  mobaynida ushbu loyiha doirasida Respublika bo‘yicha partiya Markaziy apparati tashabbusi bilan mahallalarda partiya faollari orasidan shakllantirilgan ko‘ngilli lektorlar tomonidan Respublika bo‘yicha jami 6352 ta siyosiy-huquqiy o‘quvlar tashkil etildi. Ularda
105 mingdan ortiq  tinglovchi qamrab olindi.Ushbu siyosiy-huquqiy o‘quvlarning 2750 dan ortig‘i OAVda yoritildi. 

Shuningdek, “Adolat” SDP tomonidan joriy yilning 24 iyunidan                       1 avgustiga qadar Konstitutsiya loyihasi muhokamasiga bag‘ishlab 3 810 ta tadbirlar o‘tkazildi va ularda 165 573 nafardan ortiq fuqarolar ishtirok etdi.

1 iyun “Xalqaro bolalarni himoya qilish kuni”, 3 dekabr – Xalqaro nogironlar kuni hamda 8 dekabr – O‘zbekiston Respublikasi Konstitutsiyasi qabul qilinganligining 30 yilligi arafasida “Bor mehrimiz senga, bolajon!” shiori ostida beg‘araz donorlik aksiyasi o‘tkazildi.

Aksiya davomida Respublikaning barcha hududlaridan 5 299 nafar ko‘ngillilar qatnashib, 1854,65 litr donorlik qoni yig‘ildi. 

“Bir oyda – bir ish o‘rni” loyihasi doirasida jami 3 000 nafardan ortiq xotin-qizlar va yoshlar ish bilan taʼminlandi.

 “Bir adolatchi – yuz ayolga himoyachi” loyihasi doirasida xotin -qizlarni turli xil tazyiq va zo‘ravonliklardan himoyalash maqsadida “Ayollarni zo‘ravonliklardan himoyalaymiz”, “Ayol huquqlarini taʼminlash - tenglik tamoyilining muhim omili” mavzularida jami
1 698 marta uchrashuvlar tashkil etilib, 50 940 nafar xotin-qizlar bilan suhbatlar olib borildi. Suhbatlar davomida xotin-qizlarga
“Himoya orderi”ni berish tartiblari tushuntirildi va 229 nafar ayollarga order olib berishga erishildi.

Hisobot davrida xalq deputatlari mahalliy Kengashlarda faoliyat yuritayotgan partiya deputatlari tomonidan 4000 dan ortiq deputatlik so‘rovlari chiqarilib, 2812 marotaba mansabdor shaxslarning hisobotlari eshitildi.

Xalq deputatlari mahalliy Kengashlardagi O‘zbekiston “Adolat” SDP deputatlik guruhlari tomonidan Qoraqalpog‘iston Respublikasi Jo‘qorg‘i Kengesi, xalq deputatlari viloyat, tuman va shahar Kengashlari ko‘rib chiqish uchun doimiy komissiyalarga 1365 ta, sessiyalarga esa 723 ta masalalar kiritildi. Natijada sessiya va doimiy komissiyaga kiritilgan masalalardan kelib chiqib, aniqlangan kamchiliklarni o‘z vaqtida bartaraf etish yuzasidan masʼul mansabdor shaxslarga aniq topshiriqlar berildi hamda Kengashning tegishli komissiyasi tomonidan qarorlar ijrosi nazoratga olinishi belgilandi.

Sessiyalarga masalalar kiritish bo‘yicha partiyaning xalq deputatlari Qoraqalpog‘iston Respublikasi (104 ta), Navoiy (181 ta), Buxoro (101 ta), Samarqand (87 ta), Jizzax (70 ta) viloyatlaridagi deputatlik guruhlari faol bo‘ldilar.

Biroq, partiyaning xalq deputatlari Sirdaryo (9 ta), Farg‘ona (9 ta) va Namangan (8 ta) viloyatidagi deputatlik guruhlari faoliyati samaradorligi sust bo‘ldi.

Hisobot davrida Matbuot xizmati tomonidan partiyaning dasturiy maqsadlari ommaviy axborot vositalari orqali keng targ‘ib etildi. Saylovoldi dasturini amalga oshirish yuzasidan 2022 yilga mo‘ljallangan Media rejada belgilangan vazifalar ijrosi doirasida o‘tkazilgan 

tadbirlar yuzasidan keng jamoatchilik, partiya elektoratining xabardorligi taʼminlandi.

Hisobot davrida hududiy Kengash matbuot kotiblari faoliyatini sifat jihatidan yangi bosqichga chiqarish ularni malakasini oshirish, zamonaviy texnalogiyalardan foydalanish maqsadida 9 marta onlayn seminar, 5 marta konferensiya tashkil etildi.

Partiya va deputatlik korpusi tomonidan OAV, ijtimoiy tarmoqlar va axborot saytlarida 3200 dan ortiq maqolalar eʼlon qilindi. Ularda yurtimizda amalga oshirilayotgan islohotlar, ijtimoiy tarmoqlarda muhokamalarga sabab bo‘layotgan mavzularga partiyaning munosabati va nuqtai nazari bildirildi. Respublika telekanallarida 524 marta partiya faollarining intervyulari berildi.

Partiya veb-saytida jami 6910 ta partiya faoliyati bo‘yicha maʼlumot va xabarlar yoritildi. Har bir hududiy Kengash ijtimoiy tarmoqlardagi o‘zining rasmiy sahifalarida kundalik yangilab borildi.

Partiya deputatlari va faollarining aholi bilan muloqotini yana-da jadallashtirish, joylarda hududlarning ijtimoiy-iqtisodiy rivojlanishi, sog‘liqni saqlash, taʼlim sohalaridagi islohotlarga to‘siq bo‘lib kelayotgan muammolarni o‘rganib, ularning yechimini topish masalalari partiyaning barcha tuzilmalari eʼtibori markazida bo‘lishi zarurligiga eʼtibor qaratildi.

Shuningdek, Plenumda 2022 yilga mo‘ljallangan chora-tadbirlar rejasining ijrosidagi bir qancha yutuq va kamchiliklar atroflicha tahlil qilinib, 2023 yilda amalga oshirishi rejalashtirilgan ustuvor yo‘nalishlar va ahamiyat qaratilishi kerak bo‘lgan qator masalalar qayd etildi.

Qolaversa, jarayonda so‘z olgan partiya faollari “O‘zbekiston Respublikasi Konstitutsiyasi to‘g‘risida”gi O‘zbekiston Respublikasi Konstitutsiyaviy qonuni loyihasi bo‘yicha O‘zbekiston Respublikasi referendumi, yangilanayotgan Konstitutsiyamizning yurtimiz taraqqiyoti va xalqimiz farovonligini taʼminlashdagi ahamiyati, unda eng avvalo, ustuvor yo‘nalish sifatida belgilangan “Inson qadri uchun” g‘oyasi, ilgari amal qilib kelgan “davlat – jamiyat – inson” tamoyilining “inson – jamiyat – davlat” deb o‘zgartirilishi borasida o‘z fikr-mulohazalarini bildirib o‘tdilar. Shuningdek, jamoatchilik orasida amaldagi qonunchilik asosida referendumni o‘tkazilishi, fuqarolarning mazkur muhim siyosiy jarayondagi ishtiroki bo‘yicha targ‘ibot ishlarini olib borish yuzasidan partiyaning asosiy vazifalari belgilab olindi.

Plenum so‘ngida kun tartibidagi masalalar yuzasidan tegishli qarorlar qabul qilinib, so‘zga chiqqanlar tomonidan bildirilgan fikr va takliflar asosida partiyaning kelgusi faoliyatiga doir chora-tadbirlar belgilandi.

“Adolat” SDP

Matbuot xizmati