"Adolatli jamiyat uchun ovoz beramiz"

O’zbekiston “Adolat “ SDP Buxoro viloyat Kengashi tomonidan Romitan tuman dehqon bozorida "Adolatli jamiyat uchun ovoz beramiz"  shiori ostida  Konstitutsiya qonun loyihasi targ‘iboti bo‘yicha navbatdagi tadbir o‘tkazildi. Tadbirda  Oliy Majlis Qonunchilik palatasi deputati T.Choriyev, partiya faollari va tuman aholisi ishtirok etishdi. Ko‘tarinki kayfiyatda o‘tgan uchrashuvda Oliy Majlis Qonunchilik palatasi deputati T.Choriyev so‘zga chiqib, yangilanayotgan Konstitutsiyada eng avvalo inson haq-huquqlarini himoyalash, davlatning fuqarolar oldidagi majburiyatlarini oshirishga katta mas’uliyat bilan yondashilganini alohida ta’kidlab o‘tdi. Yangi me’yorlarning mazmun-mohiyati, ta’lim rivoji va yoshlar hayotidagi o‘rniga doir muhim jihatlar xususida to‘liq ma’lumotlar berildi.

Tadbir davomida so‘zga chiqqanlar Bosh qomusimizning mamlakatimiz hayotida tutgan o‘rni, unga kiritilayotgan yangi qo‘shimcha va o‘zgarishlar xalqimizning turmush farovonligiga, inson qadrining yuksalishiga xizmat qilishini ta’kidlab, 30 aprel kuni bo‘lib o‘tadigan referendumda faol ishtirok etishga chaqirdi.

Ochiq osmon ostidagi tadbirlar viloyatimizning barcha hududlarida bayramona kayfiyatda davom etmoqda.

Mohigul Rahimqulova,

“Adolat” SDP Buxoro viloyat Kengashi matbuot kotibi.