Adolatli jamiyat uchun ovoz beramiz!

Baralla yangrayotgan va yurak toʻridan otilgan sadolar ostida shukronalik bilan kechayotgan muloqotlar 30-aprel kuni boʻlib oʻtadigan Referendumga mustahkam zamin yaratmoqda. Bayramona ruhda boʻlib oʻtgan navbatdagi tadbir Fargʻona shahri markazida joylashgan va 700 nafardan ziyod talabalar tahsil oladigan “Central Asian medical” Universitetining professor oʻqituvchilari va talabalari davrasida tashkillandi. Boʻlajak davolovchi shifokor, pediatr va stomatologlar ham yangi qonunni birdek qoʻllab-quvvatlashga hozirliklari ularning gulgun chehralarida namoyon. Jamiyatning sogʻlom turmush tarzi uchun yangi Konstitutsiyaviy qonun loyihasida belgilanayotgan xalqchil normalar ularni muhim siyosiy jarayonlarda yanada hamjihatlik bilan ovoz berishga undamoqda.

Oʻzbekiston “Adolat” SDP Fargʻona viloyat Kengashi raisi Shahnoza Gʻaniyeva, Xalq deputatlari Fargʻona shahar Kengashi deputati Bunyod Ahmadaliyevlar yangi tahrirdagi qonun loyihasida fraksiya tomonidan ilgari surilgan xalq salomatligi va tibbiyot xodimlarining manfaatlarini taʼminlash borasidagi gʻoyalari aks etganligini mamnuniyat bilan aytib oʻtdilar.

Oʻz navbatida oliygoh huquqshunoslari va boʻlajak salomatlik posbonlari koʻrgazmali qurollar asosida yangi Qonun loyihasining mohiyatini chuqur anglab yeta olganliklarini namoyish etdilar.

“30-aprel kuni barchamizning orzu-maqsadlarimizni oʻzida mujassam etgan yangi Konstitutsiyamiz uchun ovoz beramiz va sizni ham chorlaymiz”, — deydi tadbir ishtirokchilari.

“Adolat” SDP Fargʻona viloyat Kengashi
matbuot xizmati.