Advokatlik litsenziyasini olishda yuridik mutaxassislik bo‘yicha 2 yillik ish staji talabi bekor qilinadi

“Adolat” SDP fraksiyasining navbatdagi yig‘ilishida dastlab “Advokatura to‘g‘risida”gi O‘zbekiston Respublikasi Qonunining 31-moddasiga o‘zgartirish kiritish haqida”gi qonun loyihasi qizg‘in muhokama qilindi.

Advokatura zamonaviy davlat huquqiy tizimining eng muhim instituti bo‘lib, uning asosiy vazifasi fuqarolar va yuridik shaxslarga malakali va davlatdan mustaqil huquqlar, erkinliklar va qonuniy manfaatlarning himoyalanishini ta’minlashdir.

Shu bois, mamlakatimizda sud-huquq sohasida inson huquqlari, erkinliklari va qonuniy manfaatlarini himoya qilishni ta’minlashning samarali institutlaridan biri bo‘lgan advokaturaning roli va ahamiyatini oshirish bo‘yicha tizimli ishlar amalga oshirilmoqda.

Xususan, advokatura institutini va advokatlarning mustaqilligini ta’minlash, sud ishini yuritishning barcha bosqichlarida taraflarning tortishuvchanlik prinsipi asosida ishni tashkil etishga qaratilgan chora-tadbirlar amalga oshirilib, advokatlarning o‘z professional faoliyatini bajarishlari uchun zarur qonunchilik bazasi takomillashtirildi.

Shu bilan birga, advokatura sohasiga yosh mutaxassis kadrlarni keng jalb qilish, sohaning jozibadorligini ko‘tarish orqali mamlakatimizda aholiga malakali yuridik yordam ko‘rsatuvchi advokatlar salmog‘ini oshirish bilan bog‘liq muammolar hanuzgacha saqlanib qolmoqda.

Ushbu qonun loyihasi bilan advokatlik litsenziyasini olishga imtihon topshirish uchun talabgor shaxsning yuridik mutaxassislik bo‘yicha kamida ikki yillik ish stajiga ega bo‘lishi talabining bekor qilinishi oliy ta’lim tashkilotlari bitiruvchi huquqshunoslari orasida advokatura sohasiga bo‘lgan qiziqishning oshishiga, sohada kadrlar almashinuvi jarayonlari tez va sifat jihatidan yangi bosqichga ko‘tarilishiga xizmat qiladi.

Yig‘ilishda deputatlar partiya maqsad va vazifalaridan kelib chiqqan holda, qonun loyihasini yanada takomillashtirish bo‘yicha bir qator takliflar berishdi. Ko‘plab asosli takliflar ilgari surildi. Uzoq davom etgan savol-javoblardan so‘ng, ushbu qonun loyihasi deputatlar tomonidan qo‘llab-quvvatlandi.