Aholi kafolatlangan bepul tibbiy xizmatlardan foydalanadi

Mamlakatimizda 2017 yilgacha oliygohlarda o'qish uchun davlat grantlari soni faqat qisqarib kelgan bo'lsa, oxirgi olti yilda bu boradagi ahvol butunlay o'zgardi.

Bag'dod pedagogika kollejida yangilanayotgan Konstitutsiyaning mazmun-mohiyati va ahamiyatiga bag'ishlab o'tkazilgan tadbirda bu haqda ma'lum qilindi.

Tadbirda so'z olgan Oliy Majlis Qonunchilik palatasi deputati Gulbahor Saidg'anieva Bosh qomusimizda ijtimoiy davlatga xos yondashuv ta'lim sohasi bo'yicha ko'pgina modda va normalar o'z ifodasini topganligini qayd etdi.

—Yangi tahrirdagi Konstitutsiyada ta'lim va ilm-fanga oid normalar qariyb 2 barobarga oshmoqda, — dedi deputat G.Saidg'anieva. — Jumladan, fuqarolarning oliy ta'lim muassasalarida davlat granti hisobidan o'qish imkoniyati belgilab qo'yildi. Shuningdek, Asosiy qonunimizda fuqarolarning bepul boshlang'ich kasb-hunarga o'qitilishi ham belgilanmoqda.

Bag'dod tumani Tibbiyot birlashmasida bo'lib o'tgan uchrashuv chog'ida Bosh qomusimizda jamiyatning barcha qatlamlari manfaatlari inobatga olingani, xususan, aholi kafolatlangan bepul tibbiy xizmatlardan foydalanishi kiritilgani ta'kidlandi.

Tadbirda aholini qiziqtirgan barcha savollarga javob qaytarildi.