Andijonlik “adolatchilar” saylovda faollik koʻrsatadi

Oʻzbekiston “Adolat” sotsial-demokratik partiyasi Andijon viloyat kengashining XI konferensiyasi boʻlib oʻtdi. Unda viloyat kengashi aʼzolari, hududiy kengashlarning raislari, partiya faollari va OAV vakillari ishtirok etdi.

Konferensiyani viloyat partiya kengashi raisi Madaminjon Madazimov ochib, dastlab partiya faoliyatiga eʼtibor qaratdi. Andijonlik “adolatchilar” oʻz oldiga qoʻyilgan vazifalarni qay darajada bajarayotganligi, amalga oshirilayotgan islohotlarda ishtiroki va partiya loyihalar asosida olib borilayotgan ishlarga toʻxtaldi. Oʻz oʻrnida siyosiy maydonda oʻz oʻrnini mustahkamlash uchun hamma vaqt tashabbusni qoʻldan bermaslik, yangi loyihalar asosida ish olib borish zarurligini bildirdi.

Shundan soʻng konferensiya ishtirokchilari kun tartibidagi asosiy masalaga eʼtibor qaratdilar. Maʼlumki ayni kunlarda respublikamizda siyosiy voqelik-Prezident sayloviga tayyorgarlik koʻrilmoqda. Har bir partiya saylovda ishtirok etish uchun oʻz nomzodini ilgari surmoqda. Boʻlib oʻtadigan Oʻzbekiston Respublikasi Prezidenti saylovi demokratik islohotlarning yorqin ifodasi. Qolaversa, siyosiy partiyalarning jamoatchilik orasiga yanada chuqur kirib borishlariga yoʻl demakdir.

Qonun ustuvorligini taʼminlash asosiy vazifasi boʻlgan “adolatchilar” tomonidan Oʻzbekiston Prezidentligiga koʻrsatilayotgan nomzod va uning saylovda ishtirokini qoʻllab-quvvatlash oldimizda turgan dolzarb vazifa. Bu borada har bir partiya aʼzosi yanada faollik bilan ish olib borishi, saylovoldi tadbirlarni yuqori darajada tashkil etish lozim. Ayni shu maqsadda partiya yetakchilari zimmasidagi vazifalar koʻrsatib oʻtildi, amaldagi qonunchilik asosida jarayonni qonun doirasida tashkil etilishi taʼkidlandi

Oʻzbekiston “Adolat” SDP Siyosiy Kengashining Toshkent shahrida boʻlib oʻtadigan XI-Qurultoyiga delegatlarni saylash toʻgʻrisidagi masala delegatlar oldiga qoʻyildi. Partiya faoliyatida oʻz oʻrniga ega, tashabbuskor va siyosiy jarayonda masʼuliyat bilan ish olib boruvchi 5 nafar munosib nomzodlarga ovoz berildi.

Tadbir yakunida kun tartibidagi masala yuzasidan tegishli qaror qabul qilindi.

“Adolat” SDP Andijon viloyat kengashi

Matbuot xizmati.