Atrof muhit muhofazasi qonun himoyasida

Har bir davlat va jamiyat taraqqiyoti eng avvalo atrof-muhit musaffoligi bilan oʻzaro bogʻliqdir. Yangilanayotgan Konstitutsiyamizda aynan davlat atrof muhitni yaxshilash, muhofaza qilish va ekologik muvozanatni saqlash boʻyicha choralarni koʻrishi qatʼiy belgilab qoʻyilgan.

Oʻzbekiston “Adolat” SDP tomondan Qoʻshtepa tumani veterinariya va chorvachilikni rivojlantirish boʻlimida boʻlib oʻtgan navbatdagi targʻibot tadbiri “Konstitutsiyaviy islohotlar - davr talabi” mavzusida tashkil etildi.

Fargʻona viloyat Kengashi rais oʻrinbosari Shuhratdek Egamov 65 foizga yangilangan Konstitutsiya loyihasidagi qator oʻzgarishlar haqida soʻz yuritar ekan, aholi va kelajak avlod uchun ekologik toza hududni saqlab qolishning konstitutsiyaviy kafolatlariga toʻxtalib oʻtdi. Tadbir davomida partiya loyihasi doirasida ishtirokchilar eʼtiboriga havola etilgan tarqatma targʻibot vositalari yangilanayotgan Konstitutsiyamizning mazmun-mohiyatini samarali tushuntirishga va Referendumda faol ishtirok etishga undadi.

“Adolat” SDP Fargʻona viloyat Kengashi
matbuot xizmati.