Bunday holatlarga qonunlarimizda jazo choralarini kuchaytirish kerak!

OAVda Xorazm viloyatida Adliya boshqarmasi boshligʻi oilaviy mehribonlik uyidagi 15-16 va 17 yoshli qizlar bilan mehribonlik uyi rahbari yordamida qizlarni zoʻrlab kelgani haqida sovuq xabar tarqaldi. Bu barcha onalar singari meni ham qalbimni chuqur larzaga soldi.

Goʻyoki, mansabdorlar mehribonlik uyiga homiylik qilgan kishi boʻlib, ularga printer, divan oziq-ovqat vositalari olib kelib bergan, keyinchalik esa mehribonlik uyi rahbariga 200-250 ming soʻm atrofida pul berib, 10 oy davomida voyaga yetmagan qizlar bilan oʻzlarining jirkanch maqsadlarini amalga oshirib kelgan.

Eng achinarlisi shundaki, qizlar tarbiyasiga masʼul boʻlgan rahbar tarbiyachining oʻzi qizlarni mansabdorlarning nopok niyatlarini amalga oshirishi uchun majburlab, agar ular bunga koʻnmagan taqdirlarida ularga ovqat bermay och qoldirib, jazolab kelgan.

Ushbu dahshatli voqea oshkor boʻlgach, sudda qoʻshmachi rahbar ayol besh yarim yilga qamalgan va nopok niyatini amalga oshirgan mansabdorni esa bor yoʻgʻi 1,5 yil ozodlikni cheklash (uy qamogʻi) jazosi bilan jazolagan. Bu esa sudning adolatli qarori emas deb hisoblayman.

Bugun jamiyatimizda shu va shu kabi hodisalarni oldini olish yoki butunlay yoʻq qilish uchun qonunlarimizdagi jazo choralari kuchaytirilishi lozim.

Agar bunday qilmishlar uchun jazo choralari kuchaytirilmas ekan, men bir millatning onasi sifatida kelajak avlodlarning ertangi kunidan xavotirdaman!

Shu bilan birga barcha mehribonlik uylarini birma-bir qayta nazoratdan oʻtkazish lozim deb hisoblayman.

Gulniso SAIDOVA,
“Adolat” SDP Siyosiy Kengashi
Markaziy apparati Boshqarma boshligʻi.