Buyuk o‘zbek yo‘li: MILLAT VA MAMLAKAT TAQDIRIGA DAXLDORLIK TUYG‘USI

Bu qadriyat insonni ham, jamiyatni ham yuksalish sari yetaklaydi
So‘nggi yillarda O‘zbekistonda kechayotgan islohotlar hayotimizning har bir jabhasida yaqqol ko‘zga tashlanmoqda. Bu islohotlar samarasi, avvalo, xalqimiz turmush tarzini va dunyoqarashini tubdan o‘zgartirdi. Yurtdoshlarimizning jamiyatdagi o‘zgarish va yangilanishlar jarayonida faolligi oshmoqda, davlat ahamiyatiga molik muhim loyihalar ijrosini ta’minlashda ishtiroki kengayayotir. Bularning barchasi inson manfaatini ulug‘lab, obod va farovon jamiyat barpo etishni ko‘zlagan ezgu sa’y-harakatlar natijasidir.

Prezidentimiz Shavkat Mirziyoyev o‘z vazifasiga kirishgan ilk kunlardanoq kuchli demokratik davlat qurish, bu yo‘lda xalq manfaatini hamma narsadan ustun qo‘yish, jamiyatda ochiqlik, oshkoralik muhitini kuchaytirishga alohida e’tibor qaratib kelmoqda. Bu borada kechiktirib bo‘lmas vazifalarni aniqlab olish, ular tomon tizimli harakat qilish maqsadida dono xalqimiz bilan bamaslahat Harakatlar strategiyasi amalga oshirildi. Endi esa uning mantiqiy davomi bo‘lgan Taraqqiyot strategiyasi asosida yangi, yanada ulkan vazifalar ijrosiga kirishilgan. O‘tgan davr mobaynida mazkur hujjatlar asosida mamlakatda barcha sohalarda keng ko‘lamli islohotlar kechdi. Bugun bu o‘zgarish va yangilanishlarni odamlar o‘z kundalik hayotida his etmoqda. 

Albatta, qisqa muddatda bunday natijalarga erishish o‘z-o‘zidan bo‘lmaydi. Bularning zamirida davlatimiz rahbarining qat’iyati va siyosiy irodasi mujassam. Ana shunday aniq maqsad va uzoqni ko‘zlab yuritilayotgan siyosat tufayli bugun har tomonlama rivojlangan yangi O‘zbekiston barpo etilmoqda. Uchinchi Renessans poydevori yaratilib, xalq davlat idoralariga emas, balki davlat idoralari xalqqa xizmat qilishi kerak, degan g‘oya hayotda o‘z mahsulini berayotir. Natijada davlat va hokimiyat idoralarining ish prinsipi o‘zgardi. Har bir islohot va yangilanish inson manfaati, uning turmush farovonligi yo‘lida amalga oshirilishi belgilandi.

Xalq bilan muloqotning yangicha tizimi samarasi

Mamlakatda davlat organlari va tashkilotlari faoliyatida ochiqlik va oshkoralik bo‘lishi qat’iy talablardan biriga aylandi. Senator va deputatlar, vazir va hokimlar, barcha bo‘g‘indagi mansabdor shaxslar fuqarolar bilan yuzma-yuz uchrashib, ularning dardu tashvishlari bilan amalda jiddiy shug‘ullana boshladi. Ya’ni bugungi kunda davlat organlari xalq uchun, har bir fuqaro uchun ochilib, faol muloqot olib bormoqda. Bu borada xalq bilan muloqotning mutlaqo yangi tizimi, yangicha instituti yaratildi. Xususan, Prezidentimizning Virtual va Xalq qabulxonalari tashkil etildi. Natijada xalqimiz dardi-hasratini, yillar davomida yig‘ilgan muammolarini ochiq-oshkora ayta olishi imkoniyati paydo bo‘ldi. 

Inson qadri – ulug‘, u ertaga emas, uzoq kelajakda emas, aynan bugun o‘z hayotidan rozi va mamnun bo‘lib yashashi kerak, degan ezgu g‘oya ijobatini yurtdoshlarimiz bugun o‘z taqdiri va turmush hayotida ko‘rib, his qilib turibdi. Ochiqlik siyosati tufayli xalqimizning davlatga ishonchi yanada mustahkamlandi. 2022–2026 yillarga mo‘ljallangan Yangi O‘zbekistonning taraqqiyot strategiyasi asosida bu boradagi ishlar rivojlanib, inson qadrini ulug‘lash, aholining farovon yashashini ta’minlash, hayotdan rozi qilishdek ezgu ishlar tobora kengayib borayotir.

Taraqqiyot strategiyasi Harakatlar strategiyasining uzviy davomi bo‘lib, “Davlat – inson uchun” ezgu g‘oyasini hayotga tatbiq etish maqsadida uning umumxalq muhokamasi orqali qabul qilinishi muhim ishlarda xalqqa tayanish va ular bilan bamaslahat ish olib borishdek asosiy demokratik tamoyillar hayotimizdan chuqur o‘rin olganidan dalolat beradi.

Inson qadri deganda, har bir fuqaro uchun munosib turmush sharoiti va zamonaviy infratuzilmani tashkil etish, malakali tibbiy xizmat ko‘rsatish, sifatli ta’lim, ijtimoiy himoya tizimi, sog‘lom ekologik muhit yaratib berish tushuniladi. Bu maqsadga erishish uchun esa dunyoda noyob demokratik tuzilma bo‘lgan mahalla institutining katta imkoniyatlaridan samarali foydalanish, uning vakolatlarini yanada kengaytirish, pirovard natijada mahallani jamiyatimizning hal qiluvchi bo‘g‘iniga aylantirish vazifasi qo‘yilmoqda. Xususan, bugungi kunda har bir mahallaga aholi soni, ularning infratuzilmasi holatidan kelib chiqib yetarli miqdorda mablag‘ ajratilmoqda. Mahalla raislari, xotin-qizlar faollari, hokim yordamchilari, profilaktika inspektorlari fuqarolar bilan doimiy ish olib borib, ularni qiynayotgan muammolarni bosqichma-bosqich hal etmoqda. Barcha masalalar mahallaning o‘zida o‘rganilib, yechimini topmoqda. 

Prezidentimizning “2022–2023 yillarda mahallalar infratuzilmasini yanada yaxshilash bo‘yicha qo‘shimcha chora-tadbirlar to‘g‘risida”gi qarori mahallalar hayotini yangi bosqichga ko‘tardi. Qaror asosida mahallalardagi ichki yo‘llar, ichimlik va oqova suv, elektr energiyasi, gaz ta’minoti va boshqa ijtimoiy obyektlarni ta’mirlash uchun mablag‘ ajratilmoqda. 

Ijtimoiy himoyaning muhim ko‘rinishi

Aholining hayot darajasini ifoda etuvchi muhim omillardan yana biri uy-joy ta’minoti masalasidir. So‘nggi yillarda bu masala ham davlatimiz siyosatining ustuvor vazifalaridan biri sifatida belgilandi. Natijada qisqa vaqt ichida mamlakatimizda ulkan qurilish ishlari olib borilib, minglab oilalar vatan ichra kichik vataniga ega bo‘ldi. Xususan, 2018-yildan buyon uy-joy qurilishi qariyb 2 barobar ortgan. Aholi jon boshiga uy-joy bilan ta’minlanish darajasi 15,7 kvadrat metrdan 18,2 kvadrat metrgacha yoki 16 foiz oshgan. Birgina 2022 yilning o‘zida 24,3 mingta xonadon foydalanishga topshirilgan.

Shuningdek, 2020-yilda ijtimoiy nafaqa oluvchilar qamrovi 2 barobar oshirilib, 1 million 200 mingga yetdi. O‘rtacha ish haqi 1 293,8 mingdan 3 214,8 ming so‘mga oshdi. Yillar davomida yashirib kelingan kambag‘allik muammosi borligi Prezident tomonidan ochiqlanib, unga qarshi keskin kurash boshlab yuborildi. Ehtiyojmand oilalar, ayollar va yoshlar bilan manzilli ishlash bo‘yicha mutlaqo yangicha “Temir daftar”, “Ayollar daftari” va “Yoshlar daftari” tizimi joriy etildi. Mamlakatda inson huquqlari va kafolatlari kuchaytirilib, majburiy mehnatga, shu jumladan, bolalar mehnatiga butunlay barham berildi.

Avvalari o‘qituvchilar, tibbiyot xodimlari va boshqa ijtimoiy soha vakillari o‘z kasbiy faoliyati, o‘quvchi va talabalar o‘qish bilan shug‘ullanmay, butun kuz fasli davomida paxta terimiga jalb etilar edi. Maktablarda erkak o‘qituvchilarning soni keskin kamayib ketgandi. Bu, o‘z o‘rnida, bolalarning ta’lim-tarbiyasiga salbiy ta’sirini o‘tkazdi. 
Prezidentimizning siyosiy irodasi tufayli so‘nggi yillarda ushbu muammo yechim topdi. Majburiy mehnat va bolalar mehnatidan foydalanishga chek qo‘yilishi ortidan o‘zbek paxtasiga e’lon qilingan boykot bekor qilindi. Natijada dunyoning eng ko‘zga ko‘ringan uch yuzdan ortiq brendi bilan hamkorlik aloqalarini yo‘lga qo‘yish imkoniyati paydo bo‘ldi.

Bu sohada bozor iqtisodiyotining sinalgan va samarali usullari, jumladan, klaster tizimi joriy etildi. Tizim yil sayin rivojlantirildi, natijada 2021 yilga kelib respublikada agroklasterlar soni 633 taga yetdi. Ular 2,2 million gektar qishloq xo‘jaligi yerlarini qamrab oldi. Klasterlar yordamida paxta bo‘yicha gektaridan 50 sentner, g‘alla bo‘yicha 100 sentnerdan hosil olish ko‘zlanmoqda.

Ijtimoiy soha vakillarini majburiy mehnatdan ozod qilish barobarida ularning faoliyatini rivojlantirishga ham e’tibor kuchaydi. 2016-yilda bolalarni bog‘chalar bilan qamrab olish bor-yo‘g‘i 30 foizni tashkil etardi, xolos. Bugungi kunda maktabgacha ta’lim muassasalari soni qariyb 30 mingga yaqinlashdi, shundan 23 mingga yaqinini nodavlat bog‘chalar tashkil etadi. Ayni paytda 2 million 100 ming yoki 71,8 foiz bola bog‘chaga qamrab olindi. Mazkur ko‘rsatkichni 2023-yilning oxiriga qadar 75 foizga yetkazish reja qilingan.

Keng jamoatchilik va ota-onalarning fikr-takliflari asosida maktablarda 11 yillik ta’lim qayta tiklandi. Maktab o‘qituvchilarining ish yuklamalari maqbullashtirildi. Xalq ta’limi xodimlarining ijtimoiy shart-sharoitini yaxshilashga e’tibor ortdi. O‘quvchilar soni yil sayin ko‘payib, 2017/2018-o‘quv yilida jami 5271,3 mingdan, 2021/2022-o‘quv yiliga kelib 6304,6 mingga oshdi. O‘z navbatida, shunga mos ravishda maktablar hamda o‘qituvchilar soni ham ortdi. Xususan, maktablar soni 2016-yildagi 9719 tadan 2021-yilda 10 ming 289 taga yetkazildi. O‘qituvchilar soni esa 2021/2022-o‘quv yilida 510 mingga yetdi.

Yoshlarning iqtidori va salohiyatini to‘g‘ri yo‘naltirish maqsadida umumta’lim fanlarni o‘qitishning butunlay yangicha tizimi yaratildi. Prezident maktabi, ixtisoslashtirilgan hamda ijod maktablari tashkil etildi. 

Mamlakatimizda oliy ta’lim tizimida ham qator ijobiy o‘zgarishlar amalga oshirildi. Oliy o‘quv yurtlari soni 200 dan ortdi, ularga qabul kvotasi 4 barobar ko‘paydi. Natijada oliy ta’lim bilan qamrov darajasi 9 foizdan 38 foizga yetkazildi. 

Ta’lim va tarbiya masalasi umummilliy harakatga aylandi. O‘qituvchining mavqeini yuksaltirish, ustoz muallimlarga munosib shart-sharoitlarni yaratish maqsadida pedagog xodimlarning ish haqi bosqichma-bosqich oshirib borilmoqda.

Biz pandemiyani qanday yengdik?

Aholi salomatligini mustahkamlash borasida keng ko‘lamli islohotlar amalga oshirilib, ustuvor maqsadlar aniqlab olindi. Aholiga sifatli tibbiy yordam ko‘rsatish maqsadida xususiy tibbiyot tashkilotlarining tibbiy ixtisosliklar bo‘yicha litsenziya olishiga imkoniyat yaratildi. Xususiy tibbiyot muassasalari soni 1,8 barobar ko‘payib, 4000 tadan 7049 taga yetdi. 

Tez tibbiy yordam xizmatida islohotlar o‘tkazilib, bitta chaqiriqqa dori-darmon uchun ajratilgan mablag‘ 500 so‘mdan 7700 so‘mga oshirildi. Tez yordam shoxobchalari soni 5 yil ichida 818 tadan 1666 taga yetkazildi. Chaqiriqlarga o‘rtacha yetib borish vaqti 25-30 daqiqadan 8-12 daqiqaga qisqardi. Reanimobil transport vositalari soni esa 24 tadan 435 taga ko‘paytirildi.

Pandemiya oqibatlarini yumshatish va bartaraf etish uchun davlat tomonidan jami 82 trillion so‘mlik komleks chora-tadbirlar amalga oshirildi. Jumladan, inqirozga qarshi jamg‘arma tashkil etilib, koronavirusga qarshi kurashish, aholi va korxonalarni qo‘llab-quvvatlash bilan bog‘liq tadbirlarga budjetdan 16 trillion so‘mdan ortiq mablag‘ yo‘naltirildi.

Farmatsevtika sohasini izchil rivojlantirishga alohida e’tibor qaratilib, Prezidentning tegishli qarorlari qabul qilindi. Pandemiya davri uchun o‘ta muhim bo‘lgan remdesivir, favipiravir, geparin, enoksaparin va boshqa preparatlarni qisqa muddatda o‘zimizda ishlab chiqarish yo‘lga qo‘yildi. Shuningdek, Sputnik V, AstraZeneca, ZF-UZ-VAC2001, Moderna vaksinalari olib kelinib, xalqimiz bepul emlandi. Ushbu ishlar O‘zbekistonning insonparvar siyosatining muhim ko‘zgusi sifatida dunyoga bo‘y ko‘rsatdi. 

O‘zbekiston 182 mamlakat bilan savdo aloqalarini o‘rnatdi

O‘tgan vaqt davomida iqtisodiyot sohasida ham yangilanishlar, tezlik bilan o‘sish jarayonlari yuz berdi. Jumladan, yuqori o‘sish sur’atlarini ta’minlash va iqtisodiy faollikni oshirish borasida ko‘rilgan choralar natijasida iqtisodiy o‘sish yillik 4,4 foizdan 2021-yilga kelib 7,4 foizni tashkil etdi. Aholining YaIMdagi jon boshiga ulushi 2021-yilda 21 million so‘mni tashkil etib, 2,7 foizdan 5,3 foizga o‘sdi. 

Pul-kredit (monetar) siyosatidagi o‘zgarishlar haqida gapirganda, eng avvalo, valuta bozori liberallashganini alohida ta’kidlash joiz. Chunki birgina ushbu islohot tadbirkorlarning ko‘plab ovoragarchiligiga chek qo‘yib, eksportni jadallashtirishga zamin yaratdi. Bu boradagi ishlarni normativ hujjatlar bilan tartibga solish maqsadida yangi tahrirdagi “Valyutani tartibga solish to‘g‘risida”gi qonun qabul qilindi. Shuningdek, budjet mablag‘laridan samarali foydalanish tizimi takomillashtirilib, parlamentning budjet jarayonidagi roli oshirildi. “Davlat xaridlari to‘g‘risida”gi qonun, Soliq kodeksining yangi tahriri qabul qilindi. Tadbirkorlik subyektlari uchun yagona ijtimoiy to‘lov pasaytirilib, 12 foiz etib belgilandi. Soliqqa tortishni soddalashtirish maqsadida amaldagi soliqlar soni 13 tadan 9 tagacha kamaytirildi.

Xalqaro iqtisodiy munosabatlarni rivojlantirish va investitsiyalarni faol jalb etish borasida tub burilishlar yuz berdi, investitsiya siyosati takomillashtirildi. Natijada asosiy kapitalga o‘zlashtirilgan investitsiyalar hajmi ortib, 2021-yilda ularning hajmi 239,6 trillion so‘mni tashkil etdi. Ushbu ko‘rsatkich 2016-yilda bor-yo‘g‘i 51,2 trillion so‘m edi.

Bojxona nazorati protseduralarining asosiy qismi avtomatlashtirilib, jarayonlarda inson omili aralashuviga chek qo‘yilishi natijasida huquqbuzarliklar 4 barobar, bojxona tekshiruvlari soni 1,7 barobar kamaydi. O‘zbekiston jahonning 182 mamlakati bilan savdo aloqalarini o‘rnatdi. Shuningdek, sanoatning yetakchi tarmoqlarini rivojlantirish choralari ko‘rildi. Natijada sanoat mahsuloti hajmi 2021-yilda 456,1 trillion so‘mga, aholi jon boshiga sanoat mahsuloti ishlab chiqarish hajmi 13,1 million so‘mga yetkazildi. Biz uchun o‘ta muhim bo‘lgan to‘qimachilik tarmog‘ida korxonalarimiz paxtani yetishtirishdan uni chuqur qayta ishlashgacha, yakuniy mahsulot ishlab chiqarishga qadar bo‘lgan barcha texnologik jarayonlarni puxta o‘zlashtirdi. 

“Yashil rivojlanish” istiqbollari

Ona zaminimiz bag‘ridagi boy xomashyo va qazilma boyliklarni el-yurtimiz manfaatlari yo‘lida ishlatish maqsadida yuqori samarali, zamonaviy texnologiyalarga asoslangan ishlab chiqarish quvvatlari barpo etilmoqda. Shu boradagi sa’y-harakatlar tufayli keyingi yillarda Qandim gazni qayta ishlash majmuasi, Toshkent metallurgiya zavodi kabi yirik va noyob obyektlar ishga tushirildi. Navoiy kon-metallurgiya kombinati hamda O‘zbekiston metallurgiya kombinatining ishlab chiqarish quvvatlari kengaytirildi. Ana shu ishlarning davomi sifatida yaqinda yetakchi xorijiy kompaniyalar bilan hamkorlikda Olmaliq kon-metallurgiya kombinatining loyiha qiymati 2 milliard AQSh dollariga teng bo‘lgan yangi mis boyitish fabrikasi qurilishi boshlandi. Shuningdek, jahonda faqat 4 davlatda bo‘lgan yirik loyihalardan biri – “Uzbekistan GTL” sanoat majmuasi barpo etildi. 

Bundan tashqari, “yashil energetika”, “raqamli iqtisodiyot” hamda transport sohasini rivojlantirishga alohida e’tibor qaratildi. Jumladan, 394 ta yangi mahalliy avtobus yo‘nalishi ochildi. Qozog‘iston, Qirg‘iziston, Tojikiston va Rossiyaga jami 32 ta muntazam xalqaro avtobus qatnovi yo‘lga qo‘yildi. Qatnov yo‘llari uzunligi ortdi. Xususan, 2021-yilda temir yo‘llar 4732,8 kilometr, qattiq qoplamali avtomobil yo‘llari 42 299,0 kilometr va metropoliten yo‘llari 59,1 kilometrga yetkazildi. 

Iqtisodiyotni modernizatsiya va diversifikatsiya qilishda alohida ahamiyatga ega bo‘lgan xususiylashtirish jarayonida faqat davlat korxonalarini sotish emas, balki ularning raqobatdoshligini oshirish, iqtisodiy sohadagi milliy manfaatlarni mustahkamlashga xizmat qiladigan mutlaqo yangi yondashuvlarni qo‘llashga ustuvor ahamiyat qaratildi. Davlat aktivlarini sotishda shaffoflik va samaradorlikni, keng jamoatchilik ishtirokini ta’minlaydigan mexanizmlar amaliyotga joriy etildi. Ayni vaqtda davlat aktivlari, ko‘chmas mulklar, binolar, avtotransport vositalari auksionlar orqali sotuvga qo‘yilmoqda. 

Tadbirkorlik faoliyatini amalga oshirish bilan bog‘liq jarayonlar yengillashtirildi, ko‘plab yangi imtiyozlar yaratildi. Hududlarni kompleks rivojlantirishga jiddiy e’tibor qaratilmoqda. Ayniqsa, iqtisodiy va ijtimoiy jihatdan orqada qolayotgan tuman va shaharlarni taraqqiy ettirish, aholi turmush sharoitini yaxshilash masalasi muhim vazifalardan biri bo‘lib qolmoqda.

Umuman, qishloq va mahallalarni arxitektura qiyofasini tubdan o‘zgartirish borasida “Obod qishloq” va “Obod mahalla” dasturlari amaliyotga joriy etildi. Muhandislik-kommunikatsiya tarmoqlarini rivojlantirish, aholi turmush sharoitini yaxshilash bo‘yicha katta mablag‘ yo‘naltirilmoqda. Xususan, aholining ichimlik suv ta’minotini yaxshilash uchun har yili 4 trillion so‘mga yaqin, yo‘llar holatini yaxshilashga esa 6 trillion so‘mga yaqin mablag‘ ajratib kelinmoqda.

Millat va mamlakat taqdiriga daxldorlik tuyg‘usi

O‘zbekistonning har bir fuqarosi o‘z shaxsini tasdiqlovchi hujjat, ya’ni pasportida yozilganidek davlat himoyasini amalda his qilmoqda. Chet ellarda ishlayotgan fuqarolarimizga nisabatan munosabat butkul ijobiy tarafga o‘zgardi. Chet ellarda ularning huquqlari paymol bo‘lishining oldini olish, ijtimoiy muhofazasini ta’minlash, tashkillashtirilgan migratsiyani yo‘lga qo‘yish bo‘yicha mutlaqo yangi tizim yaratildi.

Bilib-bilmay turli ekstremistik yo‘llarga kirib qolgan vatandoshlarimizga nisbatan kechirimli bo‘lish, ularga insoniylikning eng yuksak namunasini ko‘rsatish muhim islohotlardan biriga aylandi. Ularni to‘g‘ri hayotga qaytarishda ilm-ma’rifat yo‘lidan borish asosiy maqsad qilib olindi. Mamlakatimiz tarixida ilk bor “Mehr” operatsiyalari amalga oshirilib, Suriya, Iroq va Afg‘onistondan ayollar va bolalar vatanimizga qaytarib olib kelingani buning yaqqol tasdig‘idir.

Shuningdek, o‘tgan davr mobaynida tashqi siyosat sohasida xorijiy, birinchi navbatda, qo‘shni mamlakatlar bilan do‘stona va o‘zaro manfaatli munosabatlarni rivojlantirish borasida izchil islohotlar amalga oshirildi. Bu borada xalqaro munosabatlarning yangi sahifasi ochildi, desak mubolag‘a bo‘lmaydi. Buning natijasida O‘zbekistonning tashqi siyosiy maydonidagi mavqei yuqori darajaga ko‘tarilib, kundan kun ortmoqda. Barcha mamlakatlar, ayniqsa, Markaziy Osiyo davlatlari bilan ko‘p asrlik do‘stlik, yaxshi qo‘shnichilik, strategik sheriklik va o‘zaro ishonch ruhidagi aloqalar mutlaqo yangi darajaga ko‘tarildi. Natijada O‘zbekistonning qo‘shni mamalakatlar bilan savdo aylanmasi 5 barobar ortdi. Yopilgan aksariyat chegara punktlari ochildi. Turli to‘siqlar olib tashlandi. Uzoq yillar bir-birini ko‘ra olmagan qarindoshlar diydorlashdi, xalqlarimiz bir-biriga yanada yaqin bo‘ldi.

Bundan tashqari, fuqarosizlikni kamaytirish maqsadida 2016-2022-yillar mobaynida fuqaroligi bo‘lmagan 76 mingdan ziyod shaxs O‘zbekiston fuqaroligiga qabul qilindi va bu holat BMT Bosh kotibi tomonidan boshqa davlatlarga namuna sifatida ko‘rsatildi.

Inson huquq va erkinliklarini ta’minlash, so‘z va diniy e’tiqod erkinligi, gender tenglik bo‘yicha erishayotgan yutuqlarimiz nufuzli xalqaro tashkilotlar bilan hamkorlikda izchil mustahkamlanib bormoqda. Xususan, O‘zbekiston milliy va diniy an’analarga sodiqlik borasida ham barchaga o‘rnak bo‘lib kelmoqda. Respublikamizdagi bag‘rikenglik siyosati tufayli 2016-2021-yillarda diniy tashkilotlar soni jami 2239 tadan 2323 taga yetdi. Ulardan 2132 tasi islomiy, 191 tasi noislomiy tashkilotdir. 2021-yilning o‘zida 96 masjid qurilib, ularning jami soni 2104 taga yetdi.

So‘nggi yillarda amalga oshirilgan va davom etayotgan keng ko‘lamli islohotlar milliy davlatchilik va suverenitetni mustahkamlashga, xavfsizlik va huquq-tartibotni, davlatimiz chegaralari daxlsizligini, jamiyatda qonun ustuvorligini, inson huquq va erkinligini, millatlararo totuvlik va diniy bag‘rikenglik muhitini ta’minlashga qaratilgani bilan ahamiyatlidir.

So‘zimiz avvalida aytganimizdek, islohotlar shunchaki amalga oshmadi. Ular millat va mamlakat taqdiriga daxldorlik, el-yurt manfaatlarini o‘z manfaatlari bilan uyg‘un ko‘rgan davlat rahbarining qat’iyati, siyosiy irodasi, shijoati va dono xalqimizning fidoyi mehnati, sabr-qanoati bilan amalga oshirildi. 

Bugun yurtimizning har bir tarmog‘idagi o‘zgarishlar, rivojlanishlar davom etmoqda. O‘ziga nisbatan talabchan bo‘lish, har bir ishni har safar yangidan boshlagandek shijoat bilan amalga oshirish, vazifalar natijasiga tanqidiy ko‘z bilan qarash talabi har bir mas’ul davlat xizmatchisi uchun muhim dasturulamal bo‘lmoqda. Zero, erishilgan yutuqlarga mahliyo bo‘lmay, ildamlashda davom etar ekanmiz, bugun tamal toshi qo‘yilayotgan yangilanishlar kelajakda, albatta, o‘z mahsulini berajak. Bu sa’y-harakatlarimiz xalqimizning ezgu orzusi bo‘lgan Uchinchi Renessansning, yuksak taraqqiy etgan yangi O‘zbekistonning poydevorini barpo etishda muhim asos bo‘lajak.

Qutbitdin BURHONOV, 
Oliy Majlis Senatining Mudofaa va 
xavfsizlik masalalari qo‘mitasi raisi