Buyuk siymoga taʼzim

Prezident Shavkat Mirziyoyevning 25 yanvardagi “Buyuk shoir va olim, mashhur davlat arbobi Zahiriddin Muhammad Bobur tavalludining 540 yilligini keng nishonlash toʻgʻrisida”gi qarori ertamiz egalarining adabiyotga, nazmga boʻlgan muhabbatini yanada oshirishda muhim oʻrin tutadi. Buyuk ajdodlarimizning xotirasini abadiylashtirish, boy adabiy merosini oʻrganish va yoshlar oʻrtasida keng targʻib etishda ahamiyatlidir. Eng muhimi sana munosabati bilan tashkil etilayotgan maʼnaviyat tadbirlarida nafaqat boburshunos olimlar, yozuvchi va shoirlar balki deputatlar ham faol ishtirok etmoqdalar.

Fargʻona tumanidagi 2-sonli MTMda tashkil etilgan “Buyuk siymoga taʼzim” tadbirida Xalq deputatlari tuman Kengashi deputatlari – O.Dadajonova, F.Mirzayev qatnashdi. Buyuk adiblarning serqirra ijodi va hayoti, ular yozib qoldirgan bebaho merosini oʻrganish har bir yigit-qiz uchun farz ekanligi taʼkidlab oʻtildi. Muassasada tarbiyalanayotgan bolajonlar tomonidan tayyorlangan sahna koʻrinishlari, qoʻshiq va raqslar, buyuk ajdodlarimiz qalamiga mansub gʻazalu ruboiylar olqishlar bilan kutib olindi.

– Bogʻchalarda sana munosabati bilan oʻtkazilayotgan tadbirlar jajji bolajonlarning ongu shuurida sheʼriyatga muhabbat, buyuk adibga hurmat ruhi shakllanishiga xizmat qiladi, – deydi F.Mirzaev. – Zero, ajdodlarimizning boy merosidan ular qanchalik erta bahramand boʻlsa, shunchalik tafakkuridan chuqurroq joy oladi.

 “Аdolat” SDP Fargʼona viloyat Kengashi

Matbuot xizmati.