Dangʻarada chorvachilik rivoji qay holatda?

Аholiga arzon va sifatli goʻsht, tuxum, sut va sut mahsulotlari yetkazib berish, bu orqali oziq-ovqatga boʻlgan talabni kafolatli qondirish va ichki bozorda narx-navo barqarorligini saqlash muhim vazifalardan biridir. Dangʻara tumanida bu borada tizimli ishlar amalga oshirilib, 66 ta chorvachilik, 25 ta baliqchilik fermer xoʻjaliklari 2022 yil yakuni bilan 10964.4 tonna goʻsht, 61679,4 tonna sut, 46.1mln. dona tuxum, 672,9 tonna baliq mahsulotlarini xalqimiz dasturxoniga yetkazib berdi.

“Аdolat” SDP Dangʻara tuman Kengashida boʻlib oʻtgan mansabdor shaxs eshituvida bu haqda soʻz borib, soha rivoji boʻyicha batafsil maʼlumot berildi. Xalq deputatlari tuman Kengashi deputatlari ishtirokida veterinariya va chorvachilikni rivojlantirish boʻlimi boshligʻi v.b Jamshid Oʻsarqulovning 2022 yil yakuni va joriy yildagi vazifalari boʻyicha hisoboti tinglandi.

Soha rivojida tuman veterinariya va chorvachilikni rivojlantirish boʻlimi, hayvon kasalliklar tashxisi va oziq-ovqat mahsulotlari xavfsizligi davlat markazi, tuman “Chorva nasl” markazi faoliyat yuritib kelmoqda. Yil davomida chorva hayvonlarni yuqumli kasalliklarga qarshi emlash tadbirlari epizootik reja asosida olib borilmoqda.

Tumandagi 49 ta mahalla fuqarolar yigʻinlari aholisining joriy yilda mol va qoʻy, parranda goʻshti, tuxum mahsulotlariga talabi aniq hisob-kitob qilinib, tumanda yetishtirish imkoniyatlari oʻrganildi. Unga koʻra fermer xoʻjaliklari va aholi tomorqalarida yetishtirilgan mahsulotlar ehtiyojni toʻliq qoplash imkoniyati mavjud. Baliq mahsulotlari koʻproq mavsumiy xarakterga ega boʻlganligi sababli yilning asosan kuz-qish mavsumida isteʼmol qilinishi inobatga olinsa, aholi ehtiyoji uchun yetarli darajada. Ijtimoiy soha tashkilotlari tumandagi fermer xoʻjaliklari tomonidan taʼminlanadi.

Shuningdek, mahsulotlari yetishtirish hajmlarini oshirish maqsadida bir qator loyihalar amalga oshirilmoqda. Jumladan, baliqchilikni rivojlantirish maqsadida “Uray” MChJ tomonidan 380 gektar koʻl maydonlarida 2022-2025 yillarda intensiv usulda baliq yetishtirish, baliq uchun ozuqa yetishtirish, muzlatgichli omborxonalar tashkil etish, forel, osyotr va sazan baliqlari yetishtirishni tashkil etish, shu bilan birga parrandachilik va boʻrdoqichilik yoʻnalishlarini rivojlantirish boʻyicha loyihalar ishlab chiqilgan. Chorvachilik yoʻnalishida faoliyat yurituvchi “Xojiqulova Muhabbatxon faxri” korxonasi tomonidan yil boshida Fransiya davlatidan 62 bosh zotli sigirlar keltirilgan boʻlsa, may oyi boshida Аvstriya davlatidan yana 33 bosh zotli sigirlar olib kelindi. Korxona chorva ozuqasini yetishtirishda ham intensiv usuldan foydalangan holda gidroponika usulida ozuqa tayyorlash usulini joriy etgan.

Parrandachilikni rivojlantirish maqsadida “Chinobod parranda” korxonasi tomonidan 90 mingta,“Oqjar parranda” korxonasi tomonidan 30 mingta, “Dangʻara broyler parranda” MChJ tomonidan 45 ta goʻsht yoʻnalishida tovuqlar yangilandi.

– “Chorvador koʻzgusi”, “Oqtov chashmasi”, “Mirzaev Аnorxoʻja”, “Universal chorva” fermer xoʻjaliklari tomonidan 800 bosh zotli qoʻylar aholiga imtiyozli kredit asosida tarqatildi. “Oil Yellow” MChJ tomonidan 11 ta xonadonga 1200 dona tovuq berildi, – deydi J.Oʻsarqulov. – Tumandagi Targʻova, Qashqar, Doimobod, Аbdusamad mahallalarida chorva mollari boqish, Taptiqsaroy, Qum qiyali, Boyboʻta mahallalarida parranda parvarish qilish koʻrsatkichi yaxshi boʻlganligi uchun mazkur mahallalarda chorvachilikni rivojlantirishga alohida imkoniyat yaratilmoqda.

Hisobotda keltirilgan maʼlumotlarning amaliy ijrosi bilan tanishish maqsadida deputatlar, yigʻilish ishtirokchilari zotli qoʻylar tarqatilgan xonadonlarga borib, aholi bilan suhbatlashdilar. Zotdor mollar boqilayotgan “Yoʻldoshev Muxtorjon qut-barakasi” fermer xoʻjaligida boʻlib, jarayon bilan tanishdilar.

Mohira Mamatqulova,
“Аdolat” SDP Dangʻara tuman Kengashi raisi.