Deputat faoliyatiga bir nazar

Mamlakatimizda inson qadrini ulugʻlash, ularga eʼtibor berish, muammolarga yechim topish va yoshlarni qoʻllab quvvatlash — bugungi kunning muhim masalalaridan biridir.

Bunda oilalar demokratik huquqiy davlatni barpo etishda va fuqarolik jamiyatini shakllantirib borishda muhim oʻrin tutadi. Albatta, oilalarda eng avvalo, oʻsib kelayotgan avlod mustahkam tarbiya topadi. Oila mustahkam boʻlsa, yurtimiz tinch va farovon boʻladi. Shuningdek, oila insonni kamol toptiradi, ijtimoiy qadriyatlar va milliy anʼanalarni avloddan-avlodga oʻtkazishda asosiy zanjir vazifasini oʻtaydi.

Insonga eʼtibor berish va inson qadrini ulugʻlash, yurtimizda yashayotgan har bir insonning huquq va erkinliklarini, qonuniy manfaatlarini taʼminlash muhim va asosiy vazifalarimizdan biridir. Bu borada jamiyatimiz asosi boʻlgan mahalla hal qiluvchi oʻrin tutadi. Mahalla tinch boʻlsa, yurt, jamiyat, har bir xonadon tinch-totuv va yanada farovon boʻladi.

Millatimiz azal-azaldan mehr-oqibatli boʻlib kelgan. Yiqilganni suyash, koʻmakka muhtojlarga yordam qoʻlini choʻzish azaliy oʻzbek xalqining urf-odatlaridandir. Hududlardagi deputatlar bugungi kunda joylarda samarali mehnatlari va tashabbuslari bilan faoliyat olib bormoqdalar.

Xalq deputatlari Buxoro shahar deputati Abdurauf Ahmedov oʻziga bildirilgan ishonchni hamma narsadan ustun qoʻygani bois, vazifasini sidqidildan bajarib kelmoqda.

Abdurauf Negmatovich doimiy tarzda nogironligi mavjud, surunkali kasalligi bor, boquvchisini yoʻqotgan, moddiy-iqtisodiy jihatdan qiynalib ogʻir turmush sharoitiga tushib qolgan xonadonlarga yordam berib, koʻpchilikni duosini olib, muammolarga yechim topmoqda.

Oʻzbekiston «Adolat» SDP tomonidan nomzodi tasdiqlanib Xalq deputatlari Buxoro shahar Kengashi deputatligiga saylangan deputat Ahmedov Abdurauf Negmatovich 2022-yil 20-fevral kuni oʻzi saylangan hudud aholisi bilan uchrashib muammolarni eshitish va har tomonlama yordam berish maqsadida Buxoro shahar «Varaxsha» MFYda boʻldi. Uchrashuvda fuqaro Muhsinov Musobek avtomashinalar dvigatelini taʼmirlash ustasi ekanligi, lekin ish boshlashi, asbob-uskunalar xarid qilishi uchun mablagʻi yetmayotganligi toʻgʻrisidagi muammosi eshitilib, MFYdagi hokim yordamchisi koʻmagida imtiyozli kredit asosida asbob-uskunalar xarid qilishga yordamlashilishi kelishib olindi, Bundan tashqari Alpomish koʻchasi 8-uy 33-xonada yashovchi fuqaro Valentina Vladimirovna tomonidan yashab kelayotgan uylarining yaqinida qurilish olib borilayotganligi, mutasaddi korxonalar tomonidan koʻrsatilgan maqsadda emas balki boshqa yoʻnalishda qurilish ishlari olib borilayotganligini aytib, shunga aniqlik kiritishda yordam soʻrab murojaat qilindi, Deputat tomonidan shu kabi murojaatlarga huquqiy maslahatlar berildi va deputatlik soʻrovi yordamida javob olinib aholiga yetkazilishi aytildi.

Sanjar Maydonov,
«Adolat» SDP Buxoro viloyat Kengashi
raisi oʻrinbosari.