“Deputat va yoshlar” uchrashuvi

Xalq deputatlari Fargʻona viloyat Kengashining “Xotin-qizlar va gender tengligi masalalari” boʻyicha doimiy komissiyasi raisi, iqtisod fanlari doktori Dilorom Mehmonova hamda Quvasoy shahar 1-sonli ixtisoslashtirilgan davlat umumtaʼlim maktabining bitiruvchi sinf oʻquvchilari ishtirokida “Deputat va yoshlar” uchrashuvi oʻtkazildi.

Uchrashuv davomida D.Mehmonova “Tadbirkor- elga madadkor” mavzusida mahorat darsi oʻtdi. Oʻquvchi yoshlarga kelajakda tadbirkorlik faoliyatini yoʻlga qoʻyishlari uchun kerakli tavsiyalar berildi.

– Yoshlarimizning tadbirkorlik sohasida bilim va koʻnikmalarini oshirish muhim ahamiyatga ega, – deydi deputat. – Chunki ularning orasida kelgusida koʻplab yangi loyihalarni amalga oshiradigan, ish oʻrinlarini yaratadigan, mahsulotini xorijga eksport qiladigan tadbirkorlar boʻlishi mumkin. Tavsiyalar va tajribalarimiz esa ularga dastak boʻlib xizmat qiladi, albatta.

“Аdolat” SDP Fargʻona viloyat Kengashi

Matbuot xizmati.