Deputat xotin-qizlarning Konstitutsion faolligini oshirishga hissa qoʻshdi

Oʻzbekiston “Adolat” SDP Qashqadaryo viloyat Kasbi tuman Kengashi va xalq deputatlari tuman Kengashi deputati Abbos Xasanov saʼy harakati bilan tuman xotin-qizlar boʻlimi tadbirgohida “Konstitutsiyaviy islohotlar xalq farovonligi uchun xizmat qiladi” mavzusida targʻibot tadbiri boʻlib oʻtdi. Jonkuyar deputat va fidoiy shifokor Abbos Xasanov tuman xotin-qizlari va keng jamoatchilik vakillari oʻrtasida yangilanayotgan Konstitutsiya normalari haqida keng tushuncha berdi.

Davr taqozosi tufayli yangilanayotgan Konstitutsiyamiz haqiqatdan ham xalq Konstitutsiyasi boʻladi,- dedi partiyamiz jonkuyari Abbos Xasanov.- Chunki unda nafaqat xotin-qizlarning, balki nuroniylar, yoshlar, nogironligi boʻlgan ijtimoiy himoyaga muhtoj shaxslar, oʻzga yurtlardagi vatandoshlarimiz hattoki-barcha –barchaning huquq va manfaatlari hisobga olinmoqda. Shuningdek bosh qomusimizda eng muhim kiritilayotgan oʻzgarishlardan yana biri homiladorligi yoki bolasi borligi sababli ayollarni ishga qabul qilishni rad etish, ishdan boʻshatish va ularning ish haqini kamaytirish taqiqlanmoqda.

Deputat oilaning toʻlaqonli rivojlanishi uchun ijtimoiy, iqtisodiy, huquqiy va boshqa shart-sharoitlar yaratish konstitutsiyaviy mustahkamlanayotgani, ushbu normaning kiritilishi jamiyatimizda oila mustahkamligi va moʻtabarligini barqaror taʼminlashga xizmat qilishini qayd etdi. Endi farzandlar tarbiyasi, ularga taʼlim berish, barkamol voyaga yetkazish ham ota-ona majburiyati sifatida belgilanayotganini tushuntirib oʻtdi. Bolaning huquqlari, erkinliklari va qonuniy manfaatlarini taʼminlash hamda himoya qilish, uning jismoniy, aqliy va madaniy jihatdan toʻlaqonli rivojlanishi uchun eng yaxshi shart-sharoitlarni yaratish esa davlatning burchi sifatida belgilanayotganini maʼlum qildi.

Targʻibot tadbiri ayollarni qiziqtirgan savol javoblarga boy boʻldi. Tadbir nihoyasida deputat barchani referendumga faol ishtirok etishga chaqirdi.

Sayyora Yusupova,
partiya faoli.