Deputat yosh kitobxonlarni taqdirladi

Kitob – hayot yoʻllarini yoritishda soʻnmas mashʼala, insonning dunyoqarashini boyituvchi va uni ezgu soʻz bilan oziqlantirguvchi bebaho manbadir. Kitob oʻqigan insonning nafaqat fikrlashi balki fazilatlari ham shakllanadi. Oʻqib-izlanishga, oʻzgalarga yordam berish, kattalarga hurmat, kichiklarga izzatda boʻlishga harakat qiladi.

Soʻx tumani “Hazrati Аli” MFYdagi 5-sonli umumtaʼlim maktabida tuman axborot-resurs markazi hamkorligida oʻtkazilgan “Yosh kitobxon” tanlovi ham shunday maqsadlarga xizmat qiladi. Eʼtiborlisi, tanlov davomida belgilangan shartlar asosida oʻzining zakiyligi, salohiyati, kitobxonligi bilan yuqori ballarni qoʻlga kiritgan yoshlarga Xalq deputatlari tuman Kengashi deputati S.Nishonov tomonidan pul mukofotlari topshirildi.

– Mahallamiz yoshlarining kitob mutolaasiga boʻlgan qiziqishini oshirish sogʻlom ijtimoiy muhit barqarorligini taʼminlashda muhim omildir, – deydi deputat. – Shu maqsadda “Hazrati Аli” ziyoratgohida kitob doʻkoni ochilgan. 200dan ziyod turli jahon va milliy adabiyotlar jamlangan ziyo maskanida mahalla bolalari nafaqat kitob xarid qilishlari balki vaqtincha oʻqish uchun olib turishlari mumkin.

 “Аdolat” SDP Fargʼona viloyat Kengashi Matbuot xizmati.