Elektr energiyasi tizimida joriy etilishi kutilayotgan yangicha islohotlar muhokama etildi

Davlatimiz rahbarining joriy yil boshida masʼullar bilan energiya taʼminoti sohasidagi nazoratning vertikal tizimini joriy etish yuzasidan oʻtkazgan yigʻilishda elektr energiyasi va tabiiy gazni yetkazib berish masalalari ijobiy hal etilayotgani, elektr energiyasi yetkazib beruvchi qurilmalarni yangilash kerakligi, shuningdek foydalanuvchilar elektr energiyasi va tabiiy gaz yetkazib berish xizmatlarini xususiylashtirish lozimligi borasidagi qator dolzarb masalalar koʻrib chiqildi.

Prezidentimiz elektr ishlab chiqarishda davlat monopoliyasidan ketib, raqobatli muhit joriy qilish zarurligini alohida taʼkidlab oʻtdi.

“Hanuzgacha tizimda oʻgʻirlik juda katta. Resurslar xoʻjasizlarcha talon-toroj qilinyapti. Birgina dekabr oyida elektr va gazdan noqonuniy foydalanish boʻyicha 12 mingdan ziyod holatda 600 milliard soʻmlik zarar aniqlangan. Avtomobillarga gaz quyish shoxobchalari ustidan nazorat butunlay izdan chiqqan” Yigʻilish davomida oʻsishlar barobarida yoʻl qoʻyilayotgan boshboshdoqliklar qattiq tanqid ostiga olindi.

Shulardan kelib chiqib, energetika sohasida nazoratni kuchaytirish va qonun ustuvorligini taʼminlash boʻyicha yangi tizim belgilandi. Bu tizimga energetika nazorati boʻyicha ikki yil “favqulodda tartibda” ishlash vazifasi qoʻyildi. Energoinspeksiya va Majburiy ijro byurosining ishini takomillashtirish, elektr va tabiiy gazga ulanishda yangicha yondashuvlarni joriy qilish yuzasidan topshiriqlar berildi.

Shuningdek panel oʻrnatgan tadbirkorlar ishlab chiqargan elektrni davlat kafolatli sotib olinishi, keyingi yildan esa boshqa isteʼmolchilarga ham sotishi mumkin boʻlishi borasidagi muhim masallar muhokama etildi.

“Aholi oʻz xonadonida panel oʻrnatsa, ehtiyojidan ortiq tarmoqqa sotgan elektr energiyasining har bir kilovatt 1 ming soʻmdan sotib olinadi (hozirgi tarif 295 soʻm)”,-dedi prezident oʻz nutqida. Bunday yondashuvni elektr-energiyasi taʼminoti borasida davlat va jamiyat oʻrtasidagi hamjihatlik va aholi daromadini oshirish yoʻlidagi istiqbolli qadamlardan biri deb baholash mumkin.

Yildan yilga tez surʼatlarda oʻsib borayotgan mamlakatimiz aholisida oʻz-oʻzidan elektr-energiyasiga boʻlgan ehtiyoj xam ortib bormoqda. Bu esa oʻz-oʻzidan eski elektr-energiya tizimimizni yangilashni, bu borada yangicha yondashuv va taqsimot metodlarini ishlab chiqishni taqozo etadi. Prezidentimiz tashabbuslari bilan hayotga tatbiq etilishi taklif etilayotgan yuqoridagi kabi takliflar bugungi kunda xalqimizni qiynab kelayotgan koʻpgina muammolarga oqilona yechim boʻla olishi bilan tahsinga sazovordir. Buning uchun bizda hamma imkoniyatlar yetarli. Jannatmakon yurtimizning quyoshli kunlaridan unumli foydalanishni samarali yoʻlga qoʻyishni uddalasak boʻlgani. Pirovard natija ham davlat ham jamiyat uchun birdek manfaatli boʻladi.

“Adolat” SDP mamlakat iqtisodiyotining barqaror rivojlanishini taʼminlash, jamiyatning innovatsion, intellektual salohiyati va inson kapitalini rivojlantirish, har bir fuqaroning qobiliyati hamda malakasidan kelib chiqqan holda mehnat qilishi kafolatlanadigan, u oʻz mehnatining miqdori va sifatiga yarasha munosib ish haqi va hayot darajasiga erishishi uchun keng imkoniyatlar yaratilgan ijtimoiy davlat qurish uchun kurashishni maqsad qilgan siyosiy harakat sifatida prezidentimizning davlat va jamiyat taraqqiyoti yoʻlida olib borayotgan bu kabi istiqbolli loyihalarini xar tomonlama qoʻllab quvvatlaydi. Va bu jarayonni jamiyatimizning barcha boʻgʻinlarida joriy etilishi yoʻlida bor kuch va salohiyatlarini ishga soladi.

“Adolat” SDP

Matbuot xizmati