Faoliyat sarhisobi: yutuq va kamchiliklar

Fargʻona shahridagi “Matbuot uyi” majlislar zalida “Аdolat” SDP Fargʻona viloyat Kengashining IX-Plenum yigʻilishi boʻlib oʻtdi. Unda viloyat Kengashi ijroiya qoʻmitasining oʻtgan yildagi faoliyati va 2022-2026 yillarga moʻljallangan Yangi Oʻzbekistonning taraqqiyot strategiyasini “Insonga eʼtibor va sifatli taʼlim yili”da amalga oshirishga oid davlat dasturidan kelib chiqadigan joriy yildagi ustuvor vazifalari tahlil etildi.

Taʼkidlanganidek, partiyaning viloyat Kengashi 2022 yilda partiyaning dasturiy vazifalarini amalga oshirishda partiya elektorati va aholining keng qatlami bilan yuzma-yuz muloqotlar tashkil etib, aʼzolik badallari tushumini tizimli yoʻlga qoʻyish va toʻliq taʼminlash, partiya faollarining siyosiy bilimlari va faolligini oshirishga alohida eʼtibor qaratdi.

Hisobot davrida partiya aʼzolari soni 1874 nafarga koʻpayib, umumiy aʼzolar soni 22149 nafarni, boshlangʻich partiya tashkilotlari soni esa 25 taga oʻsib, 420 tani tashkil qildi.

“Bir oyda — bir ish oʻrin” loyihasi doirasida jami 81 nafar xotin-qizlar va yoshlar ish bilan taʼminlandi. “Bir adolatchi – yuz ayolga himoyachi” loyihasi doirasida xotin-qizlarni turli xil tazyiq va zoʻravonliklardan himoyalash maqsadida “Аyollarni zoʻravonliklardan himoyalaymiz!” mavzularida jami 34 marotaba uchrashuvlar tashkil etilib, 65300 nafar xotin-qizlar bilan suhbatlar olib borildi. Suhbatlar davomida xotin-qizlarga “Himoya orderi”ni berish tartiblari tushuntirildi.

– Xalq deputatlari mahalliy Kengashlarda faoliyat yuritayotgan partiya deputatlari tomonidan 239 ta deputatlik soʻrovlari chiqarilib, 52 marotaba mansabdor shaxslarning hisobotlari eshitildi, – deydi viloyat Kengashi raisi Shahnoza Gʻanieva. – Xalq deputatlari mahalliy Kengashlaridagi “Аdolat” SDP deputatlik guruhlari tomonidan tuman-shahar Kengashlari koʻrib chiqish uchun doimiy komissiyalarga 10 ta, sessiyalarga esa 9 ta masalalar kiritildi. Natijada sessiya va doimiy komissiyaga kiritilgan masalalardan kelib chiqib, aniqlangan kamchiliklarni oʻz vaqtida bartaraf etish yuzasidan masʼul mansabdor shaxslarga aniq topshiriqlar berildi hamda Kengashning tegishli komissiya tomonidan qarorlar ijrosi nazoratga olinishi belgilandi. Lekin bu raqamlar juda oz. Partiya faoliyatini jonlantirish, aholining keng qatlami orasiga kirib borish, joriy yilda oʻtgan davrga nisbatan koʻproq natijaga erishishimiz kerak.

Sessiyalarga masalalar kiritish boʻyicha partiyaning xalq deputatlari Fargʻona tumani (7 ta), Oʻzbekiston tumani (1 ta), Uchkoʻprik tumani (1 ta) tumanlardagi deputatlik guruhlari faol boʻldilar. Biroq partiyaning qolgan tumanlarining deputatlik guruhlari faoliyati samaradorligi sust boʻldi.

Plenum yigʻilishi davomida kun tartibiga kiritilgan masalalar yuzasidan qarorlar qabul qilindi.

“Аdolat” SDP Fargʻona viloyat Kengashi Matbuot xizmati.