Fuqaro ishli boʻldi

Qoʻqon shahrining “Isfara guzari” MFYda yashovchi Yoqutxon Alimova boquvchisini yoʻqotgan, hozirda ishsiz. Partiyaning Qoʻqon shahar Kengashiga bandligini taʼminlashda amaliy yordam soʻrab murojaat qilgan. Partiyaning “Muammo bilan yuzma-yuz” loyihasi doirasida Kengash raisi А.Аhmadjonov tomonidan murojaat oʻrganilib, fuqaro xususiy tikuvchilik sexiga ishga joylashtirildi. Shuningdek Kengash raisi “Vatan kelajagi – yoshlar qoʻlida!” loyihasi doirasida 28-umumtaʼlim maktabida oʻrganishlar olib bordi. Mazkur maktab “Gʻishtli masjid” MFYda joylashgan boʻlib, maktabda hozirgi kunda taʼlim olayotgan oʻquvchilar soni 301 nafarni tashkil etadi. Oʻrganishlar davomida maktab kutubxonasida oʻquvchilar uchun badiiy asarlar kamligi aniqlandi.

Kutubxona mudiri B.Inoqovadan buning sababi soʻralganida XTBga talabnoma xati bilan murojaat qilgani lekin bu boʻyicha oʻzgarishlar boʻlmaganligini bildirdi. Maktab oshxonasida oʻquvchilar uchun sanitariya gigiyena qoidalariga rioya qilingan holda issiq choy, kofe, issiq ovqatlar tashkil qilingan. Maktab oshpaziga oʻquvchilarning sogʻligʻi uchun zararli energetik ichimliklar, fast-fudlar hamda boshqa mahsulotlarni sotmaslik boʻyicha tavsiyalar berildi.

“Аdolat” SDP Fargʻona viloyat Kengashi

Matbuot xizmati.