Fuqarolar haliyam mavjud holatdan norozi

Bagʻdod tumanidagi Qoʻshtegirmon MFYdagi 22-maktabgacha taʼlim tashkiloti “Open budget” loyihasiga qoʻyilgan. Biroq MTT roʻparasidagi 40-sonli maktab ham loyihaga qoʻyilgan.

Bir mahalladan yonma-yon ikki obyektning loyihaga qoʻyilishi ovozlar sonining boʻlinib ketishiga, gʻolib boʻlish imkoniyatining kamayishiga olib kelishi mumkin.

Eng yomoni, maktab va bogʻcha xodimlari nizolashib qolmoqdalar. Aslida maktabga nisbatan bogʻcha taʼmirga muhtoj.

Narsa evaziga ovoz sotib olish va minglab sim karta sotib olib ovoz berish holatlarini-ku, aytmasa ham boʻladi.

Oʻtgan yili ijtimoiy soha obyektlarini bu tizimdan chiqarib tashlashni, davlat dasturlari asosida qurilish-taʼmirlash ishlarini olib borishni taklif qilgan edik.

“Bir fuqaro — bir ovoz” tizimini yaratishni va bir hududdan boshqa hududga ovoz bermaslikni ham taklif etgandik. Oʻsha paytdagi moliya vazirligi deputatlar bilan ishlaymiz deb vaʼda berishdi.

Takliflarimizni, faktlarimizni yozib olishdi. Biroq hech narsa oʻzgarmadi. Fuqarolar haliyam bu holatlardan norozi. Narsa evaziga ovoz berishni yoʻlga qoʻyish kichik boʻlsa ham xalqni korrupsiyaga oʻrgatishdir.

Kamiga hamma ishini qoʻyib ovoz yigʻish uchun boshqa hududlarga joʻnab ketmoqda. Bu ham majburiy mehnatga oʻxshab bormoqda.