Fuqarolarning odil sudlovdan foydalanish imkoniyati yanada kengayadi

Mamlakatimiz taraqqiyotining yangi davrida sud-huquq tizimini yanada takomillashtirish, fuqarolarning huquqlari hamda qonuniy manfaatlari ishonchli himoya qilinishini taʼminlash choralarini kuchaytirish boʻyicha keng koʻlamli islohotlar olib borilmoqda.

Kuni kecha Prezidentimiz tomonidan imzolangan “Davlat boji toʻgʻrisida”gi Oʻzbekiston Respublikasi Qonuniga qoʻshimcha kiritish haqida”gi qonun ham sohada amalga oshirilayotgan ishlarning mantiqiy davomi boʻldi, desak aslo mubolagʻa boʻlmaydi.

Qayd etish joiz, 2020 yilda maʼmuriy sudlar tomonidan davlat xizmatlarini koʻrsatishga vakolatli idoralarning qarorlarini haqiqiy emas deb topish, ularning harakati yoki harakatsizligini qonunga xilof deb topishga doir 6 920 ta ish koʻrib chiqilgan, ulardan 5 257 tasi qanoatlantirilgan. 2021 yilda esa, ushbu raqamlar koʻrilgan ishlar boʻyicha 5 761 tani, qanoatlantirilgani 3 538 tani tashkil etgan.

Ushbu statistik koʻrsatgichlar tahlil qilinganda, maʼmuriy sudlar tomonidan mazkur toifadagi nizolar boʻyicha koʻrib chiqilgan ishlarning aksariyati aynan davlat xizmatlarini koʻrsatishga vakolatli boʻlgan mansabdor shaxslarning harakati yoki harakatsizligi yuzasidan berilgan arizalar hissasiga toʻgʻri kelganini koʻrish mumkin.

Bu holat mazkur toifadagi nizolar boʻyicha davlat boji miqdorini kamaytirish orqali fuqarolarga odil sudlovga erishish uchun yanada koʻproq imkoniyat yaratish, davlat xizmatlarini koʻrsatish sohasida jismoniy shaxslarning buzilgan huquqlarini sudlar orqali himoya qilinishini kengaytirish hamda qonunchiligimizga tegishli oʻzgartishlar kiritishni taqozo qilayotgan edi.

Ushbu qonun bilan davlat boji toʻgʻrisidagi qonunga qoʻshimcha kiritilib, unda fuqarolarga davlat xizmatlarini koʻrsatish bilan bogʻliq qarorlar, harakatlar yoki harakatsizligi ustidan oʻzlarining qonuniy manfaatlarini, buzilgan huquqlarini tiklash maqsadida sudlarga murojaat qilish chogʻida davlat boji toʻlovi boʻyicha belgilangan stavkani ikki barobarga kamaytirish yaʼni belgilangan stavkaning 50 foizi miqdorida boj toʻlovi toʻlash imkoniyati belgilandi.

Bir soʻz bilan aytganda, mazkur qonun fuqarolarning huquqlari va qonuniy manfaatlari sud tartibida himoya qilinishini taʼminlashga, odil sudlovdan foydalanish imkoniyatini yanada kengaytirishga xizmat qiladi.

Abdugʻani UMIROV,
Oliy Majlis Qonunchilik palatasi deputati