Halollik vaksinasi –taraqqiyot garovi

Ota- bobolarimiz halollikni hamisha qadrlab kelganlar. Oʻsha mashhur “Anor” voqeasi, “Meshkobchining meshini teshgan bola” rivoyatlari orqali qadimdan yoshi ulugʻlarimiz oʻsib kelayotgan yosh avlodni oʻzgalar haqqiga xiyonat qilmaslikka, hamisha halol rizqlanishga undab kelganlar. “Mening nafsim balodir- yonar oʻtga soladur” naqli ham nafs yoʻliga kirib, el aro sharmisor boʻlmaslikka undaydi.

Soʻx tumani Kengashi deputati Subxonali Nishonov tashabbusi bilan tumandagi Hazrat Ali MFY binosida huquqni muhofaza qilish idoralari ishtirokida tadbir tashkil etildi. “Halollik vaktsinasi –taraqqiyot garovi” loyihasi doirasidagi mazkur uchrashuvda mahalla ulugʻlari va yoshlar ishtirok etdilar. Tadbirda soʻz olganlar ijtimoiy tarmoqlar orqali yoshlarni oʻz iskanjasiga tortayotgan diniy ekstremizmning salbiy oqibatlari, giyohvandlik savdosi bilan bogʻliq jinoyatlar haqida soʻz yuritar ekanlar, “Bir bolaga yetti mahallaga ota –ona” naqliga tayangan holda avvalo oilada, mahallada va jamoat joylarida ogoh va hushyor boʻlishga, yoshlarni boshi berk koʻchaga kirib qolishlarini oldini olishga daʼvat etdilar. Uchrashuv bahs-munozaralar, taklif va istaklar hamohangligida ishtirokchilarga manzur boʻldi.  

“Adolat” SDP

Fargʻona viloyat kengashi Matbuot xizmati.