Yangiliklar 958
Hech kim qonunda belgilanganidan tashqari majburiyatni bajarishga majbur emas
Yangilanayotgan Konstitutsiyada barcha sohalarni rivojlantirish qat’iy belgilandi. Milliy iqtisodiyotni qo‘llab-quvvatlash, qulay investitsiya muhiti yaratishga alohida urg‘u berildi. Bosh qomusimizda aholining barcha qatlamlari manfaatlari aks ettirilgan.
Oliy Majlis Qonunchilik palatasi deputati Dilshod Hamzayev ishtirokida G‘uzor tumani “Obod” MFYda joylashgan 1-sonli kasb-hunar maktabda bo‘lib o‘tgan tadbirda bu haqda ma’lum qilindi.
Qayd etilganidek, yangilanayotgan Konstitutsiyaga kiritilishi taklif etilayotgan normalarning yarmidan ko‘pi insonning huquq va erkinliklarini himoya qilishning kafolatlarini kuchaytirish va mexanizmlarini mustahkamlashga qaratilgan. Xususan, Asosiy qonunimizda inson huquq va erkinliklari har kimga tug‘ilganidan boshlab tegishli bo‘lishi o‘rin olgan.
Shuningdek, yangi tahrirdagi Konstitutsiyada barchaning – bir tomondan davlat va uning organlari tizimi, ikkinchi tomondan inson, fuqaro va jamiyatning huquq va majburiyatlari aniq va lo‘nda qilib belgilab berilmoqda.
—Qonunda belgilanganidan tashqari boshqa biror-bir majburiyatni bajarishga hech kim majbur emas, — deydi deputat D.Hamzayev. — Konstitutsiyaga kiritilayotgan ushbu norma mazkur hayotiy haqiqatlarni ro‘yobga chiqarish orqali oddiy odamlarni hayotini yanada yengillashtiradi, desak mubolag‘a bo‘lmaydi.
Deputat D.Hamzayevning G‘uzor tumani “Gulshan” MFYda joylashgan 18-umumta’lim maktabi hamda “Avg‘onbog‘” MFYda bo‘lib o‘tgan uchrashuvlari davomida ham Bosh qomusimizga kiritilayotgan yangiliklar haqida batafsil ma’lumotlar berildi.
Fikringizni qoldiring