Holat qonun doirasida oʻrganilishi lozim

Ayni kunlarda ijtimoiy tarmoq va veb-saytlarda yurtimizdagi ayrim “Metan zapravka”lar ommaviy sotuvga qoʻyila boshlanganligi bilan bogʻliq xabarlar tarqaldi.

Shu oʻrinda qiziq savol tugʻiladi: Nega kutilmaganda “metan zapravkachi”lar oʻz mulklarini ommaviy sotuvga chiqara boshladi? Buning sababi nimada? Bu gaz taʼminoti bilan bogʻliqmi yoki buning boshqa sabablari ham bormi?

Ijtimoiy tarmoqlardagi ayrim foydalanuvchilar holatning bunday tus olishiga gaz taʼminotidagi beqarorlik sabab boʻlayotgani, qolaversa, gazdan noqonuniy foydalangan "zapravka" egalari faoliyati tekshiruvdan oʻtkazilayotgani sababli oʻz ulushlarini sotishga tushgani haqida fikr bildirmoqdalar.

Ammo, nima boʻlganida ham aholining yoqilgʻiga boʻlgan ehtiyojini qondirishda sezilarli ulushga ega boʻlgan mazkur gaz quyish shoxobchalarining bu kabi holatlar tufayli faoliyatida kelib chiqadigan uzilishlar fuqarolarimizga qator noqulayliklarni keltirib chiqarishi bilan bir qatorda, iqtisodiyotimizga ham oʻzining salbiy taʼsirini koʻrsatishi tabiiy.

Ushbu vaziyatda, Oʻzbekiston “Adolat” sotsial-demokratik partiyasi yuqoridagilardan kelib chiqib, sohaga aloqador davlat hokimiyati va boshqaruv organlari, xususan, Energetika vazirligi, Biznes ombudsman va Savdo sanoat palatasi “Oʻztransgaz” bilan birgalikda mazkur masalani, uning sabablarini atroflicha oʻrganib chiqish, oʻz vaqtida kerakli choralarni koʻrish va holat yuzasidan batafsil maʼlumot berilishi kerak deb hisoblaydi.

Maʼlumki, “Adolat” sotsial-demokratik partiyasi oʻz dasturiy-maqsadlarida davlat va jamiyat hayotida qonun va adolat ustuvorligiga erishish, amaldagi qonunlar ijrosi yuzasidan kuchli va samarali nazorat oʻrnatish, qonuniy manfaat va erkinliklarini himoya qilish va bu masalani davlat hokimiyatining barcha tarmoqlari, eng avvalo, davlat boshqaruvi va ayniqsa, huquqni muhofaza qilish organlar faoliyatida birinchi darajali vazifa boʻlishi kerakligini ilgari surib keladi. Shu bois, partiya “Metan zapravka”larning ommaviy sotuvga qoʻyilishi bilan bogʻliq vaziyatni oʻrganishda vakolatli tashkilotlar va huquqni muhofaza qiluvchi organlarini amaldagi qonun hujjatlariga toʻliq rioya qilishga hamda tadbirkorlarning huquqlari va manfaatlarini taʼminlashga chaqiradi.

Oʻzbekiston “Adolat” SDP
Matbuot xizmati