Ijtimoiy davlatda hech bir inson eʼtibordan chetda qolmaydi

Maʼlumki, yangilangan Konstitutsiyamizda ilk bor “ijtimoiy davlat” tushunchasi isteʼmolga kiritildi. Bu shunchaki tushuncha emas, balki uning tub mohiyatiga oldimizda turgan ustuvor vazifalar bilan bog‘liq maqsadlar singdirilgan.

Yangi saylangan O‘zbekistan Respublikasi Prezidenti Shavkat Mirziyoyevning lavozimga kirishish tantanali marosimiga bag‘ishlangan Oliy Majlis palatalari qo‘shma majlisida xalqimiz kutayotgan hamda davrning o‘zi taqozo etayotgan ko‘plab g‘oya va tashabbuslar ilgari surildi. Xususan, juda katta rejalar qo‘yildiki, ularning barchasi, eng avvalo, xalqni rozi qilish, yaʼni ularning ishlashi va yashashi uchun munosib sharoit yaratishga qaratilgani bilan diqqatga sazavor.

To‘g‘ri, ijtimoiy yo‘naltirilgan siyosat hozirga qadar ham amalga oshirib kelinayotgandi. Endilikda bu boradagi ishlar yangicha surʼat oladi.

Prezidentning saylovoldi dasturidagi birinchi maqsad ham har bir insonga o‘z salohiyatini ro‘yobga chiqarish uchun munosib sharoit yaratishga qaratilgan chora-tadbirlarni qamrab olgan. Ayniqsa, bunda sog‘liqni saqlash tizimini zamon talablari asosida rivojlantirishga alohida eʼtibor qaratiladi. Xususan, onkologik bemorlar davolanishi va sog‘ayib ketishi uchun zarur sharoit yaratilib, ularning sog‘lom hayotga qaytishi uchun barcha saʼy-harakatlar qilinadi.

Maʼlumotlarga ko‘ra, yurtimizda bugungi kunda 15 mingdan ziyod kishi onkologik yordamga muhtoj. Bu kasalliklarni muvaffaqiyati davolashning asosiy omili xastalikni dastlabki bosqichidayoq aniqlashdan iboratdir. Bu esa, yaqin istiqbolda onkologik kasalliklarni aniqlashni tizimli yo‘lga qo‘yish bilan bog‘liq qator chora-tadbirlar ko‘riladi, deganidir.  

Davlat rahbarining dasturida 120 ming nafar shunday kasalligi bor bemorlarni davolash bilan to‘liq qamrab olish uchun barcha imkoniyatni ishga solishga qaratilgan vazifalar ham ko‘zda tutilgan. Qolaversa, ehtiyojmand oilalarning onkologik kasalligi bor farzandlarida o‘zak hujayralarini transplantatsiya qilish uchun xarajatlarni to‘liq davlat hisobidan qoplashga zarur moliyaviy resurslar jalb qilinadi.

Shu birgina yo‘nalishdan ham ayon bo‘lmoqdaki, ijtimoiy davlatda hech bir inson va oila davlat eʼtiboridan va ko‘magidan chetda qolmaydi. Pirovardida mamlakatimizning bebaho boyligi bo‘lgan aholining sog‘lom va barkamol turmushini taʼminlashga zamin yaratiladi.

Tabiiyki, bu kabi ustuvor vazifalar bizga ham rahbar, ham xalq vakili sifatida katta masʼuliyat yuklaydi.

Gavhar ALIMOVA,

Oliy Majlis Senati aʼzosi.