Inson huquqlariga oid normalar 3 baravardan ortiqqa oshmoqda

Har bir davlat o‘z fuqarolari bilan munosabatga kirishar ekan, alohida huquq va majburiyatlarga ega bo‘ladi. Ya’ni, davlat ham, fuqaro ham o‘ziga xos huquqlarga va majburiyatlarga ega.

Masalan, davlat fuqarolar uchun xavfsizlik, farovonlik, tinchlik va yaxshi hayot kechirish uchun shart-sharoitlar yaratib berish kabi majburiyatlarga ega bo‘lsa, fuqarolar qonunlarga bo‘ysunish, burch va majburiyatlarni bajarish kabi mas’uliyatni o‘z zimmasiga oladi. Yangi konstitutsiyada ushbu prinsiplar alohida belgilanyapti.Favqulodda vaziyatlar vazirligi akademiyasida yangilanayotgan Konstitutsiya mazmun-mohiyatiga bag‘ishlab o‘tkazilgan tadbirda bu haqda ma’lum qilindi.Oliy Majlis Qonunchilik palatasi deputati Gulrux Agzamova Bosh qomusimizga kiritilayotgan o‘zgarishlar haqida so‘z yuritar ekan, yangi tahrirdagi Konstitutsiyamizning 20-moddasida O‘zbekiston Respublikasi fuqarosi hamda davlat bir-biriga nisbatan o‘zaro huquq va majburiyatlar bilan bog‘liqdir, deb belgilab qo‘yilayotganini qayd etdi.Mazkur moddaning ikkinchi qismida fuqarolarning Konstitutsiya va qonunlarda mustahkamlab qo‘yilgan huquq va erkinliklari daxlsizdir, ulardan sud qarorisiz mahrum etishga yoki ularni cheklab qo‘yishga hech kim haqli emas, deb ta’kidlangan.— Yangi tahrirdagi Konstitutsiya loyihasida O‘zbekiston – huquqiy davlat, deb belgilanmoqda. Xususan, inson huquq va erkinliklarini ta’minlash davlatning oliy maqsadi, deya e’lon qilinar ekan, unda inson huquqlariga oid normalar 3 baravardan ortiqqa oshmoqda, — deydi deputat G.Agzamova. — Jumladan, inson huquq va erkinliklari qonunlarimizning, davlat organlari faoliyatining mazmuniga aylanishi qat’iy talab qilinmoqda, bu hol mansabdor shaxslarning faqat fuqarolarning manfaatlarini ko‘zlab faoliyat ko‘rsatishiga qaratilgan.Tadbirda so‘z olgan professor o‘qituvchilar Konstitutsiyamizga har qanday vaziyatda dastlab xalqni aybdor deb hisoblashga oid eskicha qarashlarni parchalaydigan yangi norma kiritilayotgani, ya’ni endilikda davlat bilan yuzaga kelgan qonunchilikdagi ziddiyatlar va noaniqliklar inson foydasiga hal qilinishini ta’kidladilar.Ushbu normaning kiritilishi — so‘nggi yillarda ilgari surilgan inson qadrini e’zozlash prinsiplariga to‘la mos keladi, Qonunchilikda yechimi topilmagan har qanday masala fuqaro foydasiga hal etilishi tarixiy qadamdir.Ishtirokchilar O‘zbekiston Respublikasi konstitutsiyaviy qonuni loyihasi bo‘yicha o‘zlarini qiziqtirgan barcha savollarga mutaxassislardan batafsil javob oldi.