Inson qadr-qimmatini yuksaltirish kafolati

– Yangilanayotgan bosh qonunimizda Oʼzbekiston Respublikasi hududida boʼlib turgan har kim mamlakat boʼylab erkin harakatlanishi, turar va yashash joyini erkin tanlashi, har kim Oʼzbekistondan tashqariga erkin chiqishi hamda Oʼzbekiston Respublikasi fuqarosi Oʼzbekistonga toʼsqinliksiz qaytish huquqiga egaligi belgilanmoqda, – deydi Oliy Majlis Qonunchilik palatasi deputati M.Valiev Qoʼqon pedagogika kollejining ustozlari va oʼquvchilari bilan boʼlib oʼtgan suhbatda. – Bu ijtimoiy davlat qurishning eng muhim jihatlari hisoblanadi. Deputat konstitutsiyadagi yangi normalar, kiritilgan oʼzgarishlar haqida maʼlumot berar ekan, bularning barchasi xalqimizning turmush darajasini koʼtarish, fuqarolar huquq va manfaatlarini taʼminlash, inson qadr-qimmatini yuksaltirishga boʼlgan muhim qadam ekanligini taʼkidladi.

Shuningdek, deputat ishtirokidagi uchrashuv Qoʼqon mexanika zavodi faollari bilan ham tashkil etildi. Zavod direktori Sh.Yuldashev bilan birgalikda ishtirokchilarni qiziqtirgan savollarga javob berdilar. Konstitutsiyada har kimning mehnati uchun hech qanday kamsitishlarsiz hamda mehnatga haq toʼlashning belgilangan eng kam miqdoridan kam boʼlmagan tarzda adolatli haq olish huquqi kafolatlanayotgani taʼkidlandi.

Qoʼqon davlat pedagogika instituti akademik litseyi ustozlari va oʼquvchi yoshlari bilan boʼlgan uchrashuvda yoshlarning taʼlim olishi, ijtimoiy va tibbiy himoyasi, uy-joyli boʼlishi, bandligi uchun shart-sharoitlar yaratish – davlatning konstitutsiyaviy majburiyati sifatida kiritilayotgani hususida soʼz bordi.

 “Аdolat” SDP Fargʼona viloyat Kengashi Matbuot xizmati.