Insonga eʼtibor — faoliyatimiz mezonidir

Aytish joizki, joriy yilni “Insonga eʼtibor va sifatli taʼlim yili” deya eʼlon qilinishi bejiz emas. Sababi soʻnggi yillarda hayotimizga joriy etilayotgan barcha islohotlarning markazida Inson qadri turibdi, uning manfaatlari eng oliy mezon, deb qaralmoqda.

Shu bois, ayni kunlarda Oʻzbekiston “Adolat” sotsial-demokratik partiyasi yurtimizda yoqqan qalin qor va anomal sovuq kuzatilayotgan bir vaqtda mavjud keskinlikni biroz boʻlsa-da yumshatish, kam taʼminlangan oilalar holidan xabar olib, ularga gʻamxoʻrlik qilish, fuqarolarimizga oʻzaro mehr va iliqlik ulashish maqsadida yana bir xayriya tadbiri boshlab yubordi.

Unga koʻra, partiya Siyosiy Kengashi Markaziy apparati hamda partiyaning Toshkent shahar Kengashi tomonidan poytaxtimizdagi mahallalarda ijtimoiy himoyaga muhtoj fuqarolarga anomal sovuq sharoitida foydalanish uchun issiq uy-roʻzgʻor buyumlari tarqatildi.

Partiya faollari, deputatlar va hududlardagi mahalla faollari ishtirok etgan xayriya tadbirlarida 100 ga yaqin xonadonlar holidan xabar olinib, ularga partiya koʻmagi ulashildi.

Oʻylaymizki, bugungi kunda ham davom etayotgan partiyaning ushbu ezgu tashabbusi oz boʻlsa-da fuqarolarimizni koʻnglini koʻtarib, mavjud mavsumiy qiyinchiliklardan betalafot oʻtishlariga sabab boʻladi.

Oʻzbekiston “Adolat” SDP
Matbuot xizmati