Insonga eʼtibor va gʻamxoʻrlik davlatning eng asosiy burchi etib belgilanmoqda

Munosabat

Soʻnggi olti yilda Oʻzbekistonda amalga oshirilgan islohotlar mamlakatimizni har jihatdan taraqqiy etayotgan katta davlatga aylantirmoqda. Bu esa, oʻz navbatida, boshlangan tub oʻzgarishlarni yangi bosqichga olib chiqqan holda jadal davom ettirishni taqozo etmoqda.

Shu bilan birga, mamlakatimiz aholisi 2040-yilga borib 50 millionga yetishi, yarmidan koʻpini yoshlar tashkil qilishi, ularga munosib shart-sharoit yaratish uchun esa barqaror iqtisodiyot, xavfsiz davlat, samarali boshqaruv, ijtimoiy kafolatlar boʻlishi lozim.

Shu bois, koʻp millatli xalqimiz xohish va istaklaridan kelib chiqqan holda Bosh qomusimizga oʻzgartirish va qoʻshimchalar kiritilmoqda. Ayni kunda aholimizning fikr va takliflari asosida ishlab chiqilgan Oʻzbekiston Respublikasining yangi tahrirdagi Konstitutsiyasi loyihasi referendum uchun keng jamoatchilik muhokamasiga qoʻyildi. Xoʻsh yangi tahrirdagi Konstitutsiyaning avvalgi Konstitutsiyadan farqi nimada?

Buni birgina inson huquqlari va erkinliklari boʻlimi sezilarli darajada kengaytirilganligi misolida ham koʻrishimiz mumkin. Jumladan, yangi tahrirdagi Konstitutsiyada inson huquqlariga oid normalar 3 baravardan koʻproqqa oshmoqda. Inson huquq va erkinliklari qonunlarimizning, har bir vazirlik va idora faoliyatining mazmuniga aylanishi qatʼiy etib belgilanmoqda. Shu bilan birga, insonga eʼtibor hamda gʻamxoʻrlik davlat va jamiyatning eng asosiy burchi ekani mustahkamlanyapti.

Yana bir muhim oʻzgarish davlat ommaviy axborot vositalarining erkinligini – ularning maʼlumot toʻplash, olish va tarqatish huquqini kafolatlaydigan meʼyor ham qatʼiy belgilab qoʻyilayotganligidir. Xususan, amaldagi Konstitutsiyamizda ommaviy axborot vositalari faoliyati bilan bogʻliq faqatgina bitta 67-moddada jurnalistlar huquqlari ayrim hollarda ularga tarqatgan maʼlumoti uchun javobgarlikni nazarda tutuvchi normalar orqali belgilab qoʻyilgan edi.

Endilikda, bugungi ochiqlik va soʻz erkinligi siyosati, jamiyatda amalga oshirilayotgan islohotlarning oʻz vaqtida va samarali amalga oshirilishida OAVlar oʻrni ortib borayotganligi hisobga olinib, jurnalistlarning erkin faoliyat koʻrsatishini taʼminlash borasida davlat zimmasiga ham bir qator majburiyatlar yuklanmoqda.

Jumladan, jurnalistlar faoliyatiga oid moddalar soni 1 taga koʻpayib 81-moddada davlat ommaviy axborot vositalari faoliyatining erkinligini, ularning axborotni izlash, olish, undan foydalanish va uni tarqatishga boʻlgan huquqlari amalga oshirilishini kafolatlashi belgilanmoqda.

Umuman olganda, yangi tahrirdagi Konstitutsiyamiz bugun dunyoda roʻy berayotgan geosiyosiy oʻzgarishlar va qarama-qarshiliklar hamda yurtimizda olib borilayotgan yangilanishlardan kelib chiqqan holda 65 foizga yangilanmoqda. Natijada, moddalar soni amaldagi 128 tadan 155 taga, normalar soni esa 275 tadan 434 taga oshmoqda. Bunday xalq demokratiyasining konstitutsiyaviy asoslari qabul qilinishi uchun barchamiz 30-aprel kuni boʻlib oʻtadigan referendumda faol ishtirok etishimiz lozim.

Mavluda ATXAMJONOVA,
Oliy Majlis Qonunchilik palatasi deputati.