Ishonchingizni oqlaymiz, Yurtboshim!

Prezidentimiz Shavkat Mirziyoevning kuni kecha Yoshlar kuniga bagʼishlangan tantanali marosimdagi maʼruzasi ochigʼi biz yoshlarni cheksiz quvontirdi. Yurtboshimiz shunchalar katta ishonch bildirdiki, bu zimmamizga katta masʼuliyat yuklaydi.

Taʼkidlanganidek, yurtimiz boʼylab “Yangi Oʼzbekiston yoshlari, birlashaylik!” shiori ostida oʼtkazilgan festivallar chin maʼnoda yetuklik va haqiqiy vatanparvarlik koʼrigi boʼldi. Unda tengdoshlarimiz oʼz iqtidorlarini koʼrsatish barobarida katta kuch ekanliklarini ifodaladi. Har sohada faol yigit-qizlar Oʼzbekistonning ertasi yanada porloq ekanligidan darak. Bu yoʼlda andijonlik “Yosh adolatchilar” ham dadil borayotgani quvonarli.

Qarang, Prezidentimiz bizning harakatlarimizni quyidagicha baholadilar: “Yangi Oʼzbekistonni barpo etishga qaratilgan umumxalq harakati saflarida siz, aziz yoshlarimizning qudratli toʼlqin boʼlib maydonga chiqayotganingiz yuksak tahsinga sazovordir”. Bu ishonch, bu masʼuliyat. Bunga javoban har birimiz oʼz oldimizga yanada katta maqsadlar qoʼyishimiz, dunyo yoshlari bilan tenglashishimiz lozim. Negaki, Yangi Oʼzbekiston bugungi yoshlar bilan barpo etiladi, kelajak sari qadam qoʼyadi.

Bugun biz siyosiy maydonga ham kirib boryapmiz. Faol deputatlar, liderlar soni ortib boryapti. Bu borada ham davlatimiz rahbari yanada faol boʼlishga chaqirdilar. Oʼz oʼrnida “Biz parlamentda yoshlarni qoʼllab-quvvatlaymiz!” degan ezgu tashabbusni ilgari surdilar. Bu siyosiy yetuk yigit-qizlarni parlament va mahalliy kengashlarda ish olib borishlariga yanada keng yoʼl ochadi. Oliy Majlis deputati va senatorlariga biriktirish orqali faolligimiz yanada oshiriladi.

Xulosa qilib aytganda, Prezidentimizning ishonchini oqlaymiz.

Bekzod MUTАLLIBOV,

Oʼzbekiston “Аdolat” SDP Аndijon viloyat

kengashi “Yosh adolatchilar” qanoti faoli