Jangchi faxriylar ishtirokida targʻibot tadbiri oʻtkazildi

Yangi tahrirdagi Konstitutsiyamiz referendumga qoʻyilishi oldidan unga kiritilayotgan oʻzgartirish va qoʻshimchalarning mazmun-mohiyatini keng targʻib qilish, fuqarolarga yangi normalar yuzasidan atroflicha tushunchalar berish ayni kunlardagi muhim vazifalardan hisoblanadi.

Ayni shu maqsadda “Adolat” sotsial-demokratik partiyasi hamda Oʻzbekiston “Veteran” jangchi faxriy va nogironlar birlashmasi hamkorligida “Konstitutsiyaviy islohotlar — inson shaʼni va qadr-qimmati uchun” mavzusida tadbir tashkil etildi. Unda Oliy Majlis Qonunchilik palatasi deputatlari, partiyaning ekspertlar guruhi aʼzolari, Oʻzbekiston “Veteran” jangchi faxriylar va nogironlar birlashmasi xodimlari, veteran faxriylar ishtirok etdi.

Tadbirni Oliy Majlis Qonunchilik palatasi deputati, “Adolat” SDP fraksiyasi aʼzosi Yelena Borisova kirish soʻzi bilan ochib, “Oʻzbekiston Respublikasi Konstitutsiyasi toʻgʻrisida”gi Oʻzbekiston Respublikasi Konstitutsiyaviy qonuni loyihasi haqida maʼlumot berdi.

Qayd etilganidek, yangilanayotgan Bosh qomusimizda insonga eʼtibor, uning shaʼni va qadr-qimmatini yuksaltirishga doir qator normalar belgilanmoqda. Ilgari amal qilib kelingan “davlat – jamiyat – inson” tamoyili “inson – jamiyat – davlat” deb oʻzgartirilmoqda, yaʼni, bu eng avvalo, inson manfaatini har narsadan ustun qoʻyishni nazarda tutadi. Yangilanayotgan Konstitutsiyamiz fuqarolarning huquqlari, erkinliklari va qonuniy manfaatlari toʻlaqonli taʼminlanishiga xizmat qilishi bilan ahamiyatlidir.

Tadbirda soʻz olgan faxriylar mamlakatimizda keksalarni ardoqlash, ularga munosib hayot sharoitlarini yaratib berishga alohida eʼtibor qaratilayotganini eʼtirof etdi. Ayniqsa, “Veteran” jangchi faxriylarga, ularning oila aʼzolariga koʻrsatilayotgan gʻamxoʻrlikdan mamnun ekanliklarini bildirdi.

Faxriylar Konstitutsiyaviy qonun loyihasini qoʻllab-quvvatlagan holda bu borada fikr-mulohazalarini bildirib, ishtirokchilarni 30-aprel kuni oʻtkaziladigan referendumda faol ishtirok etishga chaqirdi.

Qolaversa, bugun partiya tashabbusi bilan Oʻzbekiston Respublikasi Texnik jihatdan tartibga solish agentligi bilan hamkorlikda oʻtkazilgan “Konstitutsiyaviy islohotlar — inson shaʼni va qadr-qimmati uchun” mavzusidagi davra suhbati jarayonlari internet tarmoqlarida onlayn tarzda jonli yoritib borildi va jarayonga oid 15 ta material tarmoqlarda eʼlon qilindi.