Jazo choralari og‘irlashtirilmoqda

Keyingi yillarda mamlakatimizda xotin-qizlarning jamiyatdagi roli, o‘rni va nufuzini mustahkamlash, ijtimoiy-siyosiy faolligini oshirish borasidagi islohotlar yangi bosqichga ko‘tarildi. Nozik hilqat vakillariga ko‘rsatilayotgan yuksak e’tibor tufayli ularning roli kundan-kun oshib bormoqda.

Ayniqsa, xotin-qizlar manfaatiga qaratilgan sa’y-harakatlar, qabul qilinayotgan me’yoriy-huquqiy hujjatlar bugun o‘zbek ayolining ham oila, ham jamiyatdagi nufuzini yuksaltirishga xizmat qilayotir.

Oliy Majlis Qonunchilik palatasidagi “Adolat” SDP fraksiyasi yig‘ilishida ko‘rib chiqilgan “Xotin-qizlar va bolalar huquqlari, erkinliklari hamda qonuniy manfaatlarini ishonchli himoya qilish tizimini yanada takomillashtirish munosabati bilan O‘zbekiston Respublikasining ayrim qonun hujjatlariga o‘zgartish va qo‘shimchalar kiritish to‘g‘risida”gi qonun loyihasi ham ularning himoyasini yanada kuchaytirishga qaratilgani bilan ahamiyatlidir.

Ta’kidlanganidek, “Adolat” SDP jamiyatning ijtimoiy-siyosiy hayotida xotin-qizlar faolligi va rolini oshirishda davom etish, ularni ijtimoiy himoya qilishni mustahkamlash bo‘yicha keng miqyosdagi islohotlarni izchillik bilan amalga oshirish tarafdori. Bu borada partiya ularning qonuniy huquq va manfaatlarini ta’minlash, ijtimoiy hayotdagi rolini yanada oshirishga alohida e’tibor qaratmoqda.

Ushbu qonun loyihasi bilan O‘zbekiston Respublikasining Jinoyat, Jinoyat-protsessual, Ma’muriy javobgarlik to‘g‘risidagi, Mehnat va Oila kodekslariga, “Xotin-qizlarni tazyiq va zo‘ravonlikdan himoya qilish to‘g‘risida”gi va “Bola huquqlarining kafolatlari to‘g‘risida” qonunlarga va boshqa bir qator qonun hujjatlariga muhim o‘zgartish va qo‘shimchalar kiritilmoqda.

Xususan, Jinoyat kodeksida ayolni o‘z homilasini sun’iy ravishda tushirishga majburlash, nomusga tegish, 16 yoshga to‘lmaganga nisbatan uyatsiz-buzuq harakatlar qilish kabi jinoyatlar uchun jazo choralari og‘irlashtirilmoqda.

Muhokamalar davomida fraksiya a’zolari qonun loyihasi yuzasidan bir qator takliflar berdi. Qizg‘in baxs-munozaralar, savol-javob va tortishuvlardan so‘ng, deputatlar qonun loyihasining zarurati va muhimligini hisobga olib, uni qo‘llab-quvvatladi.

Yig‘ilishda fraksiya vakolatiga taalluqli boshqa masalalar ham ko‘rib chiqildi.