Kelajak uchun muhim qadam

Oʻzbekiston “Adolat” SDP Farg'ona viloyati hamda shahar Kengashi tomonidan Respublika tez tibbiy yordam markazi Fargʻona hududiy filiali direktori B.Tashbaltayev bilan hamkorlikda “Oʻzbekiston Respublikasi Konstitutsiyasi toʻgʻrisida”gi Oʻzbekiston Respublikasi Konstitutsiyaviy qonuni loyihasi mazmun-mohiyatiga bagʻishlangan tadbir oʻtkazildi.

“Mening Konstitutsiyam–mening kelajagim” mavzusida oʻtkazilgan tadbirda shahar markaziy tez tibbiy yordam stansiyasidagi tez tibbiy yordam xodimlari ishtirok etdilar.

Tadbir davomida Fargʻona politexnika instituti katta oʻqituvchisi N.Oltmisheva, Respublika shoshilinch tez tibbiy yordam Fargʻona viloyati filiali kasaba uyushmasi raisi F.Vaxobova mavzu yuzasidan maʼruzalari bilan qatnashdi. Yangilanayotgan Konstitutsiya jamiyatning rivojlanishi, zamon talabidan kelib chiqayotgan hayotiy zarurat ekanligi, bu ish mamlakat, millat va xalq sifatida keyingi qadamlarimizni aniqlab olishimiz uchun gʻoyat ahamiyatli masalaligi tushuntirilib, Referendumda faol ishtirok etishga chaqirildi.

Shuningdek, Fargʻona “Ibratli bekam” oʻquv markazi qizlari tomonidan milliy liboslar namoyishi, Fargʻona shahar madaniyat va turizm boʻlimi tasarrufidagi “Joziba” raqs guruhi raqqosalari, xonandalar tomonidan konsert dasturi ishtirokchilar eʼtiboriga havola etildi.

“Adolat” SDP Fargʻona viloyat Kengashi
matbuot xizmati.