Kelgusi yetti yilda iqtisodiyot sohasida ham tub burilishlar amalga oshiriladi

Bugun barcha sohalarda belgilangan vazifa va maqsadlarga iqtisodiy barqarorlikni taʼminlamasdan turib erishib boʻlmaydi. Shu bois Prezidentimiz  inauguratsiya marosimida soʻzlagan nutqida barcha sohalarda boʻlgani kabi mamlakat iqtisodiy salohiyatini yuksaltirishga ham alohida toʻxtalib oʻtdi.

Xususan, bu borada mamlakatimizning investitsiyaviy jozibadorligi yanada oshirilib, iqtisodiyot sohasida ham tub burilishlar amalga oshirilishi belgilandi. Jumladan, “Yashil iqtisodiyot”, “yashil energiya” tamoyillari yanada keng joriy etiladi. Iqtisodiyotimizga kiritilayotgan investitsiyalar hajmi bir necha barobar oshiriladi. 2030-yilgacha yalpi ichki mahsulotimiz hajmi 160 milliard dollarga yetkaziladi.

Shuningdek, bu borada iqtisodiyotimizga investitsiyalarni keng jalb etish, bank tizimini isloh qilish eng asosiy vazifalarimizdan biri boʻlishi taʼkidlab oʻtildi. Bunda tadbirkorlik uchun yanada qulay imkoniyatlar yaratilib, yangi ish oʻrinlari ochiladi. Aholi daromadlarini koʻpaytirish, yoshlar va xotin-qizlarni zamonaviy kasb-hunarlarga oʻqitish, ularning bandligini taʼminlashga alohida eʼtibor qaratiladi.

Jumladan, Prezidentimizning saylovoldi dasturida 2030-yilgacha 250 milliard dollar investitsiyalarni oʻzlashtirish, shu jumladan, bunda 110 milliard dollarni xorijiy investitsiyalar hisobiga oʻzlashtirish, 40 milliard dollarni davlat-xususiy sheriklik doirasida jalb etish maqsad qilingan.

Shuningdek, xorijiy investitsiyalarni oʻzlashtirish bilan bir qatorda bank va moliya tizimida yillik kreditlash hajmini hozirgi 18 milliard dollardan 40 milliard dollarga yetkazish boʻyicha aniq dasturlar amalga oshiriladi. Shu bilan birga, banklarga qoʻyilayotgan omonatlar hajmi 4 barobarga oshirilib, banklarni xususiylashtirish jarayonlari tezlashtiriladi.

Buning uchun bank bozoriga yana kamida 4 ta yirik nufuzli chet el banki kirib kelishi taʼminlanib, nobank moliyaviy xizmatlarini kengaytirish uchun keng imkoniyatlar yaratiladi. Shuningdek, iqtisodiyotning qon tomiri boʻlgan tadbirkorlarni qoʻllab-quvvatlash, eksport hajmini oshirish uchun Jahon savdo tashkilotiga aʼzo boʻlish ishlarini jadallashtirishga ham alohida eʼtibor qaratiladi.

Xususan, sanoatni rivojlantirish jamgʻarmasi tashkil etilib, unga 1 milliard dollar mablagʻ ajratiladi. Qolaversa, kelgusi yillarda 50 ta nufuzli xorijiy brendlar bilan maxsus eksport zonalari tashkil qilinadi. Bu bevosita mahalliy tadbirkorlarimiz ish faoliyatiga oʻzining ijobiy natijasini koʻrsatib, ular tomonidan ishlab chiqarilayotgan mahsulotlar dunyo bozorida munosib oʻrin topishiga xizmat qiladi.

Shuningdek, har bir tumanda kamida mingta ish oʻrni yaratadigan 2 tadan yangi sanoat zonalari tashkil etiladi. Yuqorida taʼkidlab oʻtilganidek, bunday tadbirkorlik faoliyatini boshlash uchun tayyor infratuzilmaga ega boʻlgan sanoat zonalariga xorijiy investitsiyalarning keng jalb etilishi esa, har bir ish oʻrni munosib mehnat haqi bilan yaratilishiga olib keladi.

Albatta, ushbu maqsadlarga erishishda yangilangan Konstitutsiyamizga mos ravishda mavjud huquqiy-meʼyoriy bazani yangilash muhim ahamiyat kasb etadi. Bu jarayonda qonunchilik va ijro hokimiyatini takomillashtirish, fuqarolarni idorama-idora sarson qilmaydigan ixcham va samarali boshqaruv tizimini tashkil etish muhim sanaladi. Qonunchilik bazasining takomillashtirilishi esa, oʻz navbatida, biz xalq vakillari zimmasiga katta masʼuliyat yuklaydi.

Mahfirat XUSHVAQTOVA,
Oliy Majlis Qonunchilik palatasi deputati.