Ko‘p qirrali aloqalar yanada rivojlanadi

Misr xalqi mamlakatimiz bilan ming yillik mushtarak tarixga ega. Xalqlarimizning madaniy yaqinligi juda qadim zamonlarga borib taqaladi. Ota-bobolarimiz birgalikda ilm-fanni rivojlantirgan, madaniy hamkorlik, savdo-sotiq qilgan.

Xususan, buyuk ajdodimiz Ahmad Farg‘oniyning Misrda yashab, o‘lmas kashfiyotlar qilgani, Nil daryosi suvini o‘lchaydigan inshoot – "Miqyosi Nil"ni yaratgani bugungi avlodlarga yuksak iftixor bag‘ishlaydi. Qohira shahrida, buyuk Nil bo‘yida Ahmad Farg‘oniy bobomizga o‘rnatilgan muhtasham haykal esa bugun xalqlarimiz o‘rtasidagi azaliy do‘stlikning yorqin ramziga aylangan.

So‘nggi yillarda O‘zbekiston va Misr o‘rtasida ko‘p tomonlama aloqalar jadal rivojlanmoqda. Bu borada ikki davlat rahbarlari – Prezident Shavkat Mirziyoyev hamda Prezident Abdulfattoh as-Sisiy tomonidan olib borilayotgan hamkorlik strategiyasi muhim o‘rin tutmoqda.

Prezidentimiz Shavkat Mirziyoyevning joriy yil 20-21 fevral kunlari Misr Arab Respublikasi Prezidenti Abdulfattoh as-Sisining taklifiga binoan ushbu mamlakatga rasmiy tashrifi tarixiy ahamiyatga ega bo‘lib, ikki tomonlama aloqalarni sifat jihatidan yangi pag‘onaga olib chiqishga xizmat qiladi.

Davlatimiz rahbari Misrga tashrifini Ahmad Farg‘oniy merosi ziyoratidan boshlagani bejiz emas. Sababi bu buyuk vatandoshimiz o‘z davrining yetuk astronomi, matematigi va geografi bo‘lgan. Bag‘dod va Damashqda ilmiy tadqiqotlar o‘tkazib, 856 yildan Qohirada yashab, umrining so‘nggiga qadar Misrda ilm-fan bilan shug‘ullangan.

Ahmad Farg‘oniyning ilm-fanga qo‘shgan hissasi biqiyos. Ulug‘ allomaning hozirgacha saqlanib kelayotgan merosi, umuman, o‘zbeklarning Misr tarixidagi o‘rni xalqlarimiz o‘rtasidagi azaliy do‘stlikdan dalolat beradi. Buyuk bobokalonimiz davrida shakllangan do‘stlik rishtalari keyingi yillarda sifat jihatdan yangi bosqichga ko‘tarildi.

U yaratgan har bir asarning ahamiyati, uning har qaysi soha rivojiga qo‘shgan hissasi, sermazmun hayotining sahifalari ko‘plab maqolalar, kitoblar mavzui barcha yurtdoshlarimiz, ayniqsa, yoshlar uchun faxr-iftixor manbaidir.

Sir emaski, O‘zbekiston va Misr iqtisodiyotlari bir-birini to‘ldirib turuvchi xususiyatga ega. Bu borada beshta aniq yo‘nalishda — gaz-kimyo, to‘qimachilik, elektrotexnika, zargarlik va farmatsevtika tarmoqlarida hamkorlik qilish choralari belgilab olingani nafaqat o‘zaro hamkorlikni mustahkamlashga xizmat qiladi, balki barcha sohalarda ulkan yuksalishlarga turtki beradi.

Bugungi kunda O‘zbekiston mintaqaviy transport tarmoqlari loyihalariga ham katta ahamiyat qaratmoqda. Muzokaralar davomida energetika sohasida qo‘shma loyihalarni amalga oshirish, shuningdek, O‘zbekiston va Misrni bog‘lab turgan transport yo‘laklarini rivojlantirish choralariga alohida e’tibor qaratilgani ikki tomonlama hamkorlikni yangi pog‘onaga ko‘tarishi, shubhasiz.

Aytish joizki, Misr — arab davlatlari orasida birinchilardan bo‘lib, 1992 yilning 26 dekabrida mamlakatimiz mustaqilligini tan olgan. O‘zbekiston Misr davlati bilan xalqaro maydonda ilk diplomatik aloqalarni yo‘lga qo‘ygan davrdan boshlab, to hozirga vaqtga qadar ishonchli hamkor ekanligini namoyon etdi.

So‘nggi yillarda ikki davlat o‘rtasidagi parlamentlararo muloqotlar ham ancha faollashdi. Parlamentlararo hamkorlik parlament diplomatiyasining mavqeini yuksaltirishga, tomonlarning o‘zaro pozitsiyalarini yaqinlashtirishga, davlatlararo munosabatlarni tartibga soluvchi normativ-huquqiy hujjatlarning qabul qilinishiga zamin yaratadi.

Umuman olganda, O‘zbekiston va Misr o‘rtasidagi xalqaro hamkorlik aloqalari yil sayin mustahkamlanib bormoqda. Ushbu tashrif davlatlarimiz hamkorligi tarixida yangi sahifa ochish barobarida, kelgusida ikki mamlakatning yanada yaqin aloqalarida yangi bosqichni boshlab beradi.

Zuxra IBRAGIMOVA,
Oliy Majlis Qonunchilik palatasi Spikeri o‘rinbosari