Konstitutsiya yangi normalari inson huquqlari ustuvorligini ta’minlashga xizmat qiladi

Shu kunlarda Oliy Majlis Senati a’zolari hududlarda bo‘lib, mehnat jamoalari, aholi vakillari bilan uchrashuvlar o‘tkazishmoqda. Ularda yangi tahrirdagi konstitutsiya loyihasining mazmun-mohiyati hamda shu yilning 30 aprel kuni bo‘lib o‘tadigan referendumning ahamiyati bosh mavzu bo‘lmoqda. Jumladan Senatning Mudofaa va xavfsizlik masalalari qo‘mitasi raisi Q. Burxonov Toshkent viloyati O‘rta Chirchiq tumani “Changtepa” mahallasi ahli bilan uchrashdi.

Suhbat chog‘ida hozirgi kunda 1782 nafar fuqaro istiqomat  kiladigan mahallani ichimlik suvi bilan to‘liq ta’minlash masalasi, shuningdek, yangilanayotgan Konstitutsiyaning normalari haqida so‘z bordi. 

Xususan, “Konstitutsiyaning yagona manbai va muallifi xalq bo‘lishi kerak” g‘oyasi asosida Konstitutsiyaviy qonun loyihasi bo‘yicha umumhalq muhokamasi o‘tkazilib, jami aholidan uni takomillashtirish bo‘yicha 220 mingdan ortiq takliflar olingani va ularning har to‘rttasidan bittasi loyihadan joy olganini aytib o‘tdi.   

Q. Burxonov yangi tahrirdagi Konstitutsiya loyihasida inson huquq va erkinliklarini ta’minlash davlatning oliy majburiyati etib belgilayotganiga alohida to‘xtalib o‘tdi. Xususan, yangi Konstitutsiyada inson va davlat organlari o‘rtasidagi yuzaga keladigan noaniqliklar inson foydasiga talqin qilinishi, huquqiy ta’sir choralari qonuniy maqsadga erishish uchun yetarli va mutanosib bo‘lishi lozimligi aks ettirilmoqda, ushbu qoidalar inson huquqlari ustuvorligini ta’minlashga, davlat idoralarining o‘z vazifalarini inson huquqlariga rioya qilgan holda amalga oshirishda mas’uliyatini yanada oshirishiga hamda insonga me’yoridan ortiq huquqiy ta’sir choralari qo‘llanilishining oldini olishga xizmat qilishi ta’kidlab o‘tildi.

Senatorlarning hududlarda aholi bilan muloqotlari davom etmoqda.