Konstitutsiyani takomillashtirish – davr talabi

Ayni paytda mamlakatimizda muhim jarayon – yangi tahrirdagi Oʻzbekiston Respublikasi Konstitutsiyasini aholi oʻrtasida keng targʻib etish va referendum kuniga tayyorgarlik ishlari olib borilmoqda. “Adolat” SDPning mahalliy shahar-tuman Kengashi raislari va deputatlari tomonidan tashkilot va muassasalarda baxtimiz qomusiga kiritilgan yangi mezonlar mazmun-mohiyatiga bagʻishlangan targʻibot tadbirlari oʻtkazilmoqda.

Quvasoy shahri hokimligida Xalq deputatlari viloyat Kengashi deputati Dilorom Mehmonova ishtirokida “Oʻzbekiston Respublikasi Konstitutsiyasi toʻgʻrisida”gi konstitutsiyaviy Qonun mazmun-mohiyati va referendumda fuqarolarning ishtirok etish tartiblari, uning ahamiyati yuzasidan oʻquv seminari tashkil etildi.

Fargʻona tuman hokimligi, tuman tibbiyot birlashmasi majlislar zalida oʻtkazilgan “Konstitutsiyani takomillashtirish – davr talabi” mavzusidagi davra suhbatida partiyaning Fargʻona tuman Kengashi raisi N.Karimov, Xalq deputatlari Fargʻona tuman Kengashi deputatlari – O.Dadajonova, F.Mirzayev, N.Isaqov ishtirok etdi.

Yangi tahrirdagi Konstitutsiyaning xalqimiz manfaatlarini ifoda etishdagi oʻrni, unda jonajon xalqimizning xohish-irodasi mujassamligi, yangi mezonlar asosida takomillashtirilganligi xususida soʻz yuritildi.

Fargʻona olimpiya va paralimpiya sport turlariga tayyorlash markazida oʻtkazilgan davra suhbatida Xalq deputatlari Fargʻona shahar Kengashi deputati B.Ahmadaliyev Oʻzbekiston Respublikasi Konstitutsiyasi toʻgʻrisida”gi Oʻzbekiston Respublikasi Konstitutsiyaviy qonuni haqida ishtirokchilarga atroflicha tushuncha berdi.

Baxtimiz qomusida aholi kafolatlangan bepul tibbiy xizmatlardan foydalanishiga ham alohida urgʻu berilgan. Umuman, loyihada aholi salomatligini asrash bilan bogʻliq normalar 4 barobar koʻpaytirilmoqda. Bu aholi sogʻligʻini ishonchli muhofaza etish hamda onalar va bolalar oʻlimi, yuqumli kasalliklar tahdidini bartaraf etishda juda muhim ahamiyatga egadir, – deydi partiyaning Uchkoʻprik tuman Kengashi raisi O.Hakimova tuman tibbiyot birlashmasida oʻtkazilgan tadbirda.

Oʻzbekiston tuman hokimligida oʻtkazilgan targʻibot tadbirida partiyaning tuman Kengashi raisi, Xalq deputatlari tuman Kengashi deputati M.Hamidova yangilangan konstitutsiyada inson huquq va erkinliklarini taʼminlash davlatning oliy maqsadi sifatida eʼtirof etilgani, inson huquqlariga oid normalar 3 baravar oshganligini taʼkidladi.

Targʻibot tadbirlari davom etmoqda.

“Adolat” SDP Fargʻona viloyat Kengashi matbuot xizmati.