Konstitutsiyaviy islohotlar — inson shaʼni va qadr-qimmati uchun!

Shu kunlarda respublikamizning barcha hududlarida yangilanayotgan Konstitutsiyamizning mazmun-mohiyatiga bagʻishlangan tadbirlar davom etmoqda. Bu borada “Adolat” SDP tomonidan hududlarda, davlat va nodavlat tashkilotlarda, taʼlim va turli sohaga oid muassasalarda tashkil etilayotgan uchrashuvlar, muloqotlar, davra suhbatlari, seminarlar, umuman olganda keng koʻlamli targʻibot-tashviqot tadbirlari har jihatdan samarali kechmoqda.

Bugun ham “Oʻzbekiston Respublikasi Konstitutsiyasi toʻgʻrisida”gi Oʻzbekiston Respublikasi Konstitutsiyaviy Qonuni loyihasining referendumga qoʻyilishi oldidan unga kiritilayotgan oʻzgartirish va qoʻshimchalarning mazmun-mohiyatini keng aholi qatlamlari orasida targʻib qilish maqsadida, “Adolat” sotsial-demokratik partiyasi Siyosiy Kengashi Markaziy apparati hamda partiyaning Toshkent shahar kengashi tashabbuskorligida Toshkent tibbiyot akademiyasi bilan hamkorlikda mazkur oliygoh huzuridagi akademik litseyi tadbirlar zalida “Konstitutsiyaviy islohotlar — inson shaʼni va qadr-qimmati uchun” mavzusida davra suhbati oʻtkazildi.

Unda Oliy Majlis Qonunchilik palatasi deputatlari, partiyaning ekspertlar guruhi masʼullari, Toshkent tibbiyot akademiyasi professor-oʻqituvchilari, “Adolat” SDP Siyosiy Kengashi rahbariyati va partiya Markaziy apparati hamda Toshkent shahar Kengashi xodimlari, “Yosh adolatchilar” qanoti faollari, “Yoshlar parlamenti” aʼzolari, jamoatchilik hamda OAVlar vakillari, shuningdek, talaba-yoshlar ishtirok etishdi.

Yangi Oʻzbekistonda konstitutsiyaviy islohotlarning ahamiyati, aholining keng qatlami, ayniqsa yoshlarning huquqiy va siyosiy madaniyatini mustahkamlash, faol fuqaroviy pozitsiyasini oshirish, “Oʻzbekiston Respublikasi Konstitutsiyasi toʻgʻrisida”gi Oʻzbekiston Respublikasi Konstitutsiyaviy Qonuni loyihasining referendumga qoʻyilishi oldidan unga kiritilayotgan oʻzgartirish va qoʻshimchalarning mazmun-mohiyatini keng targʻib qilish maqsadida oʻtkazilayotgan mazkur tadbirni partiya Siyosiy Kengashi raisi Abduhalimov Bahrom Abdurahimovich kirish soʻzi bilan ochib berdi.

Taʼkidlanganidek, Yangi tahrirdagi Konstitutsiyamizda birgina yoshlarning huquq va erkinliklarining kafolatlanishi borasidagi normalar soni ikki baravarga oshmoqda. Xususan, unga kiritilayotgan konseptual oʻzgarishlar qatorida jamiyatning yarmidan koʻpini tashkil qiladigan yoshlarga munosib hayot sharoiti yaratish, barqaror iqtisodiyot, xavfsiz davlat, samarali boshqaruv, ijtimoiy kafolatlar yanada mustahkamlanmoqda.

Shuningdek, jarayonda soʻz olganlar “Oʻzbekiston Respublikasi Konstitutsiyasi toʻgʻrisida”gi Oʻzbekiston Respublikasi Konstitutsiyaviy qonuni loyihasini qoʻllab-quvvatlarkan, bu boradagi oʻz fikr-mulohazalari bilan oʻrtoqlashdi.

Taʼlim olish, ijtimoiy va tibbiy himoya, uy-joyli boʻlish, aholi bandligini taʼminlash – davlatning konstitutsiyaviy majburiyati sifatida kiritilayotganligi, mazkur normalar, nafaqat yoshlar, insonlar manfaati, balki, butun jamiyatimiz va mamlakatimizning kelgusi taqdiri uchun muhim ekanligi aytib oʻtildi.

Koʻtarinki ruhda, qizgʻin savol-javoblarga boy tarzda oʻtgan tadbir davomida ishtirokchilar tomonidan xilma-xil fikrlar oʻrtaga tashlandi.

Oʻzbekiston “Adolat” SDP
Matbuot xizmati