Mamlakat sarhadlariga bog‘liq qonunlar qo‘mita majlisida muhokama qilindi

Joriy yil 5-aprel kuni Senatning Mudofaa va xavfsizlik masalalari qo‘mitasi majlisi bo‘lib o‘tdi. Unda senatorlar, ekspertlar, vazirlik va idoralar, Oliy Majlis Qonunchilik muammolari va parlament tadqiqotlari instituti vakillari va OAV xodimlari ishtirok etdi.  

Majlisda Senatning navbatdagi yalpi majlisida ko‘rib chiqilishi nazarda tutilgan masalalar dastlabki tarzda muhokama qilindi.

Jumladan, O‘zbekiston Respublikasi Oliy Majlisi Inson huquqlari bo‘yicha vakili (ombudsman)ning 2022-yildagi faoliyati to‘g‘risidagi hisoboti ko‘rib chiqildi. 

Shundan so‘ng “O‘zbekiston Respublikasining Davlat chegarasi to‘g‘risida”gi Qonun muhokama qilindi.

Ta’kidlanganidek, Qonunda davlat chegarasini belgilash, o‘zgartirish, qo‘riqlash va himoya qilish sohasidagi asosiy tushunchalar, Davlat chegarasini quruqlikda, chegara daryolarida, ko‘llar, samoviy hudud va boshqa joylarda shaxslar va transport vositalarining kesib o‘tish tartibi hamda Davlat chegarasi va o‘tkazish punktlari rejimi, rejim talablari, ularni buzish tushunchalari aniq belgilanib, batafsil yoritib berilmoqda. 

Qonun bilan Vazirlar Mahkamasi va Davlat xavfsizlik xizmatiga mos ravishda chegara zonasida va o‘tkazish punktlarida chegara rejimini o‘rnatish, ichki ishlar organlari va Davlat xavfsizlik xizmati Chegara qo‘shinlariga ularning vakolatlari doirasida rejimga rioya qilinishini ta’minlash yuzasidan vazifalar yuklanmoqda, o‘tkazish punktlarida shaxslar, transport vositalari, tovarlar, boshqa mulk va hayvonlarga nisbatan chegara nazorati tartiblari qonuniy mustahkamlanmoqda.

Qonunda O‘zbekiston Respublikasi fuqarolari, chet el fuqarolari va fuqaroligi bo‘lmagan shaxslar hamda transport vositalarining chegara zonasiga va o‘tkazish punktlariga kirishi (chiqishi), o‘tishi, bo‘lishi (yashashi), harakatlanishi tartiblari hamda Davlat chegarasida, chegara mintaqasida va o‘tkazish punktlarida xo‘jalik va boshqa faoliyatni olib borish qoidalari va yana bir qator masalalar batafsil belgilanmoqda. 

Mazkur Qonun 9 ta bob va 73 ta moddadan iborat bo‘lib, uning qabul qilinishi O‘zbekiston Respublikasi Davlat chegarasini ishonchli qo‘riqlash va himoya qilishga, vazirlik va idoralarning Davlat chegarasidagi vakolatlarini tizimli ravishda belgilashga, Davlat chegarasini qo‘riqlash va himoya qilishda qurol-yarog‘, harbiy texnika, maxsus vositalar, jismoniy kuch va xizmat hayvonlarini qo‘llash tartibining huquqiy asoslarini yaratishga xizmat qiladi. 

Bundan tashqari, Qo‘mita majlisida “O‘zbekiston Respublikasining Ma’muriy javobgarlik to‘g‘risidagi kodeksiga O‘zbekiston Respublikasining Davlat chegarasini qo‘riqlash va himoya qilishni yanada kuchaytirishga qaratilgan qo‘shimcha va o‘zgartishlar kiritish haqida”gi Qonun ham ko‘rib chiqildi. 

Ta’kidlanganidek, Ma’muriy javobgarlik to‘g‘risidagi kodeksning tegishli moddasida ichki ishlar organlari va Milliy gvardiya bilan bir qatorda Davlat xavfsizlik xizmatining ham huquqbuzarlikni sodir etish sabablari hamda shart-sharoitlarini bartaraf etish yuzasidan yozma taqdimnomalarini bajarish choralarini ko‘rmaganligi uchun javobgarlik belgilanmoqda.

Shuningdek, Qonundagi o‘zgarishga muvofiq chet el fuqarosi yoki fuqaroligi bo‘lmagan shaxsning O‘zbekiston Respublikasida bo‘lish qoidalari yoki muddatlarini buzishi bilan bog‘liq ma’muriy huquqbuzarliklarni ko‘rib chiqish, shaxsni ma’muriy yo‘l bilan ushlab turish hamda transport vositalarini ushlab turish va ko‘rikdan o‘tkazish vakolati ichki ishlar organlari bilan bir qatorda Davlat xavfsizlik xizmati Chegara qo‘shinlariga ham berilmoqda.

Muhokama qilingan masala yuzasidan Qo‘mitaning tegishli qarori qabul qilindi.