Mamlakatimizda salohiyatli yangi avlodni kamol toptirish — ustuvor vazifadir

Davlat va jamiyat boshqaruvida ham, biznesni taraqqiy ettirishda ham, umuman, barcha soha rivojida salohiyatli yoshlar muhim oʻrin tutadi. Sababi ular jamiyat uchun “yangi qon” vazifasini oʻtaydi. Yangidan yangi tashabbus, gʻoyalarni ilgari surish, zamonaviy ish yuritish uslublarini joriy qilishda ana shu qatlamning nuqtai nazari va saʼy-harakatlari alohida ahamiyat kasb etadi.

Shu bois bugungi kunda yurtimizda zamonaviy bilim va koʻnikmalarga ega, mamlakatning munosib kelajagi uchun javobgarlikni oʻz zimmasiga ola biladigan, intiluvchan va sergʻayrat yoshlarni tarbiyalashga alohida eʼtibor qaratilmoqda.

2018 yil 27 iyun sanasi yurtimiz yoshlari hayotida yangi sahifa ochilgan kun sifatida tarixga muhrlandi. Oʻzbekiston Respublikasi Prezidenti Farmoni bilan “Yoshlar — kelajagimiz” Davlat dasturi tasdiqlandi. Mazkur hujjatning muhimligi shundaki, u joylarda yoshlarning ijtimoiy-iqtisodiy faolligini oshirish, ularni tadbirkorlik faoliyatiga keng jalb qilish, yosh tadbirkorlarning istiqbolli gʻoyalari va loyihalarini roʻyobga chiqarish, shuningdek, shu asosda yoshlar bandligini taʼminlashga toʻsqinlik qilayotgan tizimli muammolarni bartaraf etishga yoʻnaltirilgan.

Albatta, ushbu hujjatning samarali ijro etilishini taʼminlash barchamiz uchun ustuvor vazifa. Shu nuqtai nazardan, Oliy Majlis Qonunchilik palatasida Yoshlar masalalari boʻyicha komissiyaning yaqinda boʻlib oʻtgan davra suhbati dolzarb mavzuga bagʻishlandi. Tadbirda Oʻzbekiston Respublikasi Prezidentining mazkur Farmoni mazmun-mohiyati, unda belgilangan vazifalarni amalga oshirish ustidan jamoatchilik va parlament nazoratini olib borish, Yoshlar masalalari boʻyicha komissiya hamda siyosiy partiyalarning “Yoshlar qanotlari” oldida turgan vazifalar muhokama etildi.

Deputatlar, siyosiy partiyalarning “Yoshlar qanotlari” rahbarlari va faollari, mutasaddi vazirlik hamda idoralarning masʼul xodimlari, shuningdek, ommaviy axborot vositalari vakillari qatnashgan tadbirda davlatimiz rahbari Farmonida belgilab berilgan ustuvor yoʻnalishlardan kelib chiqib, parlament quyi palatasining pozitsiyasi belgilab olindi.

Qonunchilik palatasining hududlarga biriktirilgan deputatlari tomonidan Davlat dasturining mazmun-mohiyatini keng yoshlar ommasiga yetkazish boʻyicha targʻibot va tashviqot tadbirlari olib borildi. Farmonda belgilangan vazifalar ijrosini taʼminlash yuzasidan qilinayotgan ishlarda hududiy va mahalliy ishchi guruhlarga amaliy koʻmak koʻrsatildi.

Qonunchilik palatasi deputatlari ishtirokidagi bunday seminarlar barcha tuman va shaharlarda tashkil etildi.

Qonunchilik palatasi deputatlari tuman va shahar ishchi guruhlari bilan birgalikda uyma-uy yurib, yoshlar bilan uchrashishdi, aniqlangan muammolarni hal etishda, ishsiz yigit-qizlar bandligini taʼminlashda hamda tadbirkorlik faoliyatini boshlash istagidagi yoshlarga amaliy yordam koʻrsatishdi. Shu bilan birga, Farmonda belgilangan vazifalarning joylardagi ijrosini taʼminlashda yoʻl qoʻyilayotgan kamchiliklar, yuzaga kelayotgan muammolarni hal etish boʻyicha tavsiyalar hamda koʻrsatmalar berib borishdi. “Yoshlar — kelajagimiz” jamgʻarmasining tuman va shahar filiallari direktorligiga nomzodlar tanlashda ham koʻmaklashildi.

Internet manbalar asosida Gulhayo
Rahmonova tayyorladi.