Mansabdor shaxs eshituvi: Harbiy-vatanparvar yoshlar – yurt tayanchi

Xalq deputatlari Fargʻona tuman Kengashidagi “Adolat” SDP deputatlik guruhi tomonidan viloyat Kengashi raisi v.b Sh.Egamov, Xalq deputatlari tuman Kengashi kotibiyati vakillari ishtirokida tuman mudofaa ishlari boʻlimi qoshidagi “Vatan tayanchi” bolalar va oʻsmirlar harbiy-vatanparvarlik harakatiga masʼullarning eshituvi oʻtkazildi. Shuningdek, partiyaning “Fikr – Gʻoya – Harakat” loyihasi doirasida oʻtkazilgan mansabdor shaxs eshituvida sohaga daxldor Xalq taʼlimi boʻlimi, Yoshlar ishlari agentligi boʻlimi rahbarlari va masʼul xodimlari qatnashdi.

Oʻzbekiston Respublikasi Prezidentining 2022 yil 2 martdagi “Vatan Tayanchi” bolalar va oʻsmirlar harbiy-vatanparvarlik harakati faoliyatini tashkil yetish toʻgʻrisida”gi Qarori asosida tashkil etilgan mazkur harakat yoshlarni vatanparvarlik, milliy anʼana va qadriyatlarimizga hurmat ruhida tarbiyalash, turli xavfli gʻoyalar va “ommaviy madaniyat” niqobi ostida kirib kelayotgan salbiy taʼsirlardan himoya qilishni koʻzda tutadi.

Oʻsib kelayotgan yosh avlodni Vatan taqdiriga daxldor, mustaqil qaror qabul qilishga qodir, mamlakatining, xalqi va oʻz oilasining farovonligi va yanada rivojlanishi orzusida bor kuch va imkoniyatlarini safarbar etadigan fidoyilarni tarbiyalash harakatning asosiy vazifalaridan biridir. Davlat umumtaʼlim maktablarida oʻquvchilarni otryad atrofida birlashtirish va jipslashtirish ularning jismoniy imkoniyatlarini oshiribgina qolmay, yashirin iqtidorlarni kashf qilishga zamin yaratadi.

Eshituv doirasida harakatning yoshlar siyosatini amalga oshirish, ertamiz egalarini harbiy-vatanparvar inson etib kamol toptirishga qaratilgan faoliyati yuzasidan hisoboti tinglandi. Tuman miqyosida amalga oshirilgan ishlar hamda ahamiyat berilishi kerak boʻlgan masalalar atroflicha muhokama qilindi. Belgilangan kamchiliklar va bildirilgan takliflar yuzasidan yuqori turuvchi tashkilotlarga taqdimnomalar kiritilishi belgilandi.

“Аdolat” SDP Fargʻona viloyat Kengashi

Matbuot xizmati.