Navroʻz arafasida Andijonda “YANGI NAFAS”

Navroʻzi olam koʻngillarga quvonch va yaxshi kayfiyat ulashuvchi tantana. Bayram arafasida turli tadbirlar tashkil etish anʼanaga aylangan. Andijonda oʻtkazilgan “Yangi Nafas” sport tadbiri ham oʻziga xos bayramga aylandi. Oʻn mingdan ziyod andijonliklar qatorida “Adolat” SDP aʼzolari ham mazkur musobaqada faol ishtirok etdi.

Bugungi kunda ommaviy yugurish Markaziy Osiyoda tashkillashtirilgan ommaviy sport tadbirlaridan biriga aylanib ulgurdi. “Bir vatanda, bir vaqtda, bir masofaga, bir maqsadda — birga yuguramiz” shiori ostida oʻtkazilgan ushbu sport-vatanparvarlik tadbiri aholini sogʻlomlashtirishga xizmat qiladi.

Madaminjon Madazimov, “Adolat” SDP Andijon viloyat kengashi raisi:

-Ommaviy yugurish musobaqalariga jamoatchilikda qiziqish ortib boryapti, desak mubolagʻa boʻlmaydi. Ishtirokchilar orasida imkoniyati cheklangan yuguruvchilar ham borligi eʼtiborli. Aytish mumkinki bu yurtdoshlarimizda sportga qiziqish va tibbiy madaniyat oʻsib borayotganini koʻrsatadi.

Musobaqa doirasida sanʼatkorlar tomonidan kuy-qoʻshiqlar ijro etildi. Ommaviy raqslar koʻngillarga shodlik olib kirish barobarida barchani sogʻlom turmush tarzi sari boshladi.

“Adolat” SDP Andijon viloyat kengashi

Matbuot kotibi.