Oʻqituvchi maqomi mustahkamlanmoqda

Yangilanayotgan Konstitutsiya Oʻzbekiston jamiyatining evolyutsion rivojlanishidan kelib chiqayotgan hayotiy zarurat boʻlib, bu ish mamlakat, millat va xalq sifatida keyingi qadamlarimizni aniqlab olishimiz uchun gʻoyat ahamiyatli masala, adolatli jamiyat qurish yoʻlidagi ulkan qadamdir. Tariximizda ilk bora “Oʻzbekiston – ijtimoiy davlat”, deb belgilanmoqda.

Yaʼni, insonga eʼtibor hamda gʻamxoʻrlik – davlat va jamiyatning eng asosiy burchi ekani mustahkamlanyapti. Bu tamoyil “Adolat” SDPning ham asosiy maqsad-vazifalarida ifoda etilgan.

Bosh qomusimizda davlatning oʻqituvchilar shaʼni va qadr-qimmatini himoya qilish, ularning ijtimoiy va moddiy farovonligi, kasbiy jihatdan shakllanib borishiga urgʻu berilgani ham bejiz emas.

Taʼlim sifatini zamonaviy bilimlarga ega, hayotdan rozi oʻqituvchisiz taʼminlab boʻlmaydi. Shu bois, oʻqituvchining ijtimoiy va moddiy farovonligi haqida qaygʻurish, uning hurmatini joyiga qoʻyish davr talabidir. Yangi norma davlat organlari va boshqa tashkilotlarning maktablar va oʻqituvchilar faoliyatiga asossiz aralashuviga, pedagog kadrlarning shaʼni va qadr-qimmati kamsitilishiga, ularning mehnatga majburlanishiga, taʼlim-tarbiya jarayoniga toʻsqinlik qilishiga, oʻqituvchilarning huquqlari buzilishiga yoʻl qoʻymaslik boʻyicha toʻlaqonli choralarni koʻrishga olib keladi.

Kiritilayotgan norma soha vakillarining ijtimoiy qoʻllab-quvvatlanishi, tashkiliy-huquqiy shart-sharoitlar yaratilishi, oʻz huquq va qonuniy manfaatlarini taʼminlashga xizmat qiladi.

Shahnoza Gʻaniyeva,
Oʻzbekiston “Adolat” SDP
Fargʻona viloyat Kengashi raisi.