“Oʻzbekiston Respublikasi Prezidenti saylovida yoshlarning ishtiroki”

Saylov – mamlakatning siyosiy-ijtimoiy hayotidagi eng muhim siyosiy jarayonlardan biri. Har bir saylovchining ovozi zamirida mamlakatning ertasi, avlodlar kelajagi va fuqarolarning ijtimoiy-siyosiy haq-huquqlari mujassam.

Shu bois, saylovchilarning aksar qismi yoshlarni tashkil etayotgan ayni sharoitda kelajagimiz egalariga boʻlgan eʼtibor muhim ahamiyatga ega. Bu borada yoshlarimizga mamlakatimizning barcha sohalarida, jumladan, milliy saylov tizimida amalga oshirilayotgan dadil islohotlarning yuksak samaralari haqida tushunchalar berish, ularni saylov jarayonlari bilan batafsil tanishtirib borish zarur.

Shu kabi maqsadlarni koʻzlagan holda, Oʻzbekiston “Adolat” sotsial-demokratik partiya Siyosiy Kengashi Markaziy apparati majlislar zalida “Oʻzbekiston Respublikasi Prezidenti saylovida yoshlarning ishtiroki” mavzusida konferensiya tashkil etildi.

Mamlakatimizda kechayotgan muhim siyosiy jarayonlarda partiyaning “Yosh adolatchilar” qanoti, “Yoshlar parlamenti” aʼzolari hamda volontyorlar guruhlari tomonidan hududlardagi yosh saylovchilar, ayniqsa, birinchi marta saylovda ishtirok etadigan yoshlarning huquqiy savodxonligini oshirish, ularda faol fuqarolik pozitsiyasini yuksaltirish hamda ijtimoiy-siyosiy jarayonlarga daxldorlik hissini oshirishga bagʻishlangan tadbirda Oʻzbekiston Respublikasi Oliy Majlis Qonunchilik palatasi deputatlari, “Adolat” SDP Siyosiy Kengashi aʼzolari, partiya Markaziy apparati hamda Toshkent shahar Kengashi xodimlari, partiyaning “Yosh adolatchilar” qanoti Respublika va hududiy Kengashlari raislari va faol aʼzolari, “Yoshlar parlamenti” aʼzolari hamda OAVlar xodimlari ishtirok etishdi.

Tadbirni partiya Siyosiy Kengashi raisi Bahrom Abduhalimov kirish soʻzi bilan ochib berdi. Unda partiya lideri yigʻilganlarga ayni davrdagi va kutilayotgan muhim siyosiy jarayonlarning mamlakatimiz ravnaqi va xalqimiz farovonligini taʼminlashdagi ahamiyati haqida soʻz yuritib, bu borada aholimizni, xususan yoshlarimizni faol va tashabbuskor boʻlishi lozimligini taʼkidladi.

Shuningdek, Oliy Majlis Qonunchilik palatasi deputati, Yoshlar masalalari boʻyicha komissiyasi raisi, partiyaning “Yosh adolatchilar” qanoti Respublika Kengashi raisi, Muhammadjon Valiyevning “Oʻzbekiston Respublikasi Prezidenti saylovida “Yosh adolatchilar” qanoti Kengashi oldida turgan muhim vazifalar” mavzusidagi maʼruzasi tinglandi.

Qolaversa, jarayonda Oliy Majlis Qonunchilik palatasi huzuridagi “Yoshlar parlamenti” aʼzosi, yuridik fanlari boʻyicha falsafa doktori, partiyaning “Yosh adolatchilar” qanoti Respublika Kengashi raisi oʻrinbosari Akbarshoh Teshaboyev tomonidan yoshlarning saylash huquqiga doir batafsil maʼlumotlar berib oʻtildi.

Shu bilan birgalikda, tadbirda soʻz olgan partiya faollari kun tartibidagi masala yuzasidan oʻz tajribalari bilan oʻrtoqlashdilar.

Konstruktiv ruhda, oʻzaro fikr-mulohazalar almashish imkoniyati yaratilgan tadbir yakunida yosh “Adolat”chilar oʻzlarini qiziqtirgan savollarga batafsil javoblar olishdi.

“Adolat” SDP Matbuot xizmati.