O‘zgarishlar odamlar qalbida hayotga, kelajakka katta umid uyg‘otmoqda

Mamlakatimizda keyingi yillarda olib borilayotgan izchil islohotlar natijasida barcha hududlar qatori Qorakalpog‘iston Respublikasi ham ijtimoiy-iqtisodiy jihatdan jadal rivojlanib bormoqda. O‘tgan davrda o‘lkada necha o‘n yilliklarda amalga oshmagan ishlar qilindi, desak mubolag‘aga yo‘ymang.

Ayniqsa, o‘tgan qisqa davrda hududda odamlarning yetti uxlab tushiga ham kirmaydigan olamshumul o‘zgarish va yangilanishlarga yuz tutdi. Barcha shahar va tumanlar, qishloqlar, mahallalar yangicha qiyofa kasb etmoqda.

Avval rivojlanishdan orqada qolgan ovullarda shaharliklar ham havas qiladigan darajada uylar, sog‘likni saqlash muassasalari, bolalar bog‘chalari, san’at va madaniyat saroylari qurilmoqda. Umuman, Qoraqalpog‘istonda hamma sohada o‘zgarish bo‘layapti.

Prezidentimizning hududlar rivoji va aholi hayoti bilan tanishish maqsadida shu yil 30 mart kuni Qoraqalpog‘iston Respublikasiga tashrifi o‘lka aholisi kuchiga-kuch, g‘ayratiga-g‘ayrat qo‘shib, ularni yangi marralar sari ruhlantirgani rost.

Ushbu tashrifning ahamiyatli jihati shundaki, uning doirasida belgilab berilgan barcha vazifalar, ilgari surilgan aniq taklif va tashabbuslar faqat va faqat aholining yashash sharoitlarini yaxshilash, bandlikni ta’minlash, odamlarni rozi qilish, eng muhimi, insonni e’zozlashga qaratilgan.

Yaqin-yaqingacha Kegeyli tumanida sanoat umuman yo‘q edi. Iqtisodiyotni tarkibiy o‘zgartirish bo‘yicha qilinayotgan ishlar, hududlararo hamkorlik natijalari bu yerda ham sezilmoqda. Xususan, andijonlik tadbirkorlar bilan birgalikda uchta loyiha ishga tushirildi.

Davlatimiz rahbari o‘lkaga tashrifini tumandagi “Aqtuba tekstil” korxonasidan boshladi. Ushbu korxona yiliga 3 million donadan ziyod trikotaj ishlab chiqarish quvvatiga ega. Buning uchun Germaniya, Yaponiya va Turkiyadan zamonaviy uskunalar keltirib o‘rnatilgan. Eng muhimi, bu yerda 500 ta ish o‘rni yaratilgan.

Kegeyli tumanida Qoraqalpog‘iston Respublikasida sanoatini rivojlantirish, qayta tiklanuvchi energiya manbalarini joriy etish, aholi bandligini ta’minlash, kambag‘allikni qisqartirish masalalari yuzasidan o‘tkazilgan yig‘ilishda Qoraqalpog‘iston aholisi farovonligini yanada oshirishga qaratilgan 3 ta yangi tashabbusni ilgari surildi.

Masalan, birinchi tashabbus doirasida Qoraqalpog‘istondagi 452 ta mahallaning har biriga to‘g‘ridan-to‘g‘ri 500 million so‘mdan qo‘shimcha mablag‘ ajratiladi. Buning uchun alohida Qoraqalpog‘iston mahallalarini qo‘llab-quvvatlash jamg‘armasi tashkil qilinib, unga joriy yilda 250 milliard so‘m yo‘naltiriladi.

Bugungi kunda Qoraqalpog‘istonda 47 ming uy-joy va ko‘chmas mulklarning kadastri yo‘q. Bu – odamlarimizni ipoteka olish, tomorqasida dehqonchilikka kredit, subsidiya olish, yashayotgan boshpanasini farzandlariga meros qoldirish imkoniyatini cheklayapti. Shu sababli keyingi ikki oyda 38 ming odamning kadastri to‘liq qilib beriladi.

E’tiborlisi, Qoraqalpog‘istonda yiliga 6,5-7 mingta uy-joyga talab borligi hisobga olinib, 2023 yil o‘tgan yilga nisbatan 2 baravar ko‘p yoki 4 mingta uy-joy qurilishi qanchadan-qancha oilalarga quvonch, shodlik olib kirdi, desam ayni haqiqat.

Sir emaski, Qoraqalpog‘iston Respublikasida 72 mingta rasmiy ishsiz borligi bu borada zarur choralar ko‘rishni tazoqo etardi. Bundan buyon har yili 43 ming yosh mehnat bozoriga kirib kelishi hisobga olinib, 193 mingta yangi ish o‘rinlari yaratiladi.

Oziq-ovqat mahsulotlari mo‘l va arzon bo‘lishini taminlash maqsadida 2022 yilda aholiga 6 ming 600 gektar yer berilgan bo‘lsa, joriy yilda ham qo‘shimcha ravishda shuncha yer ajratilmoqda. Bu orkali sabzavot va poliz mahsulotlariga bo‘lgan ehtiyoj qoplanadi.

Nukus shahridagi Altin jag‘is maxallasida 4 mingdan ziyod aholi istiqomat qiladi. Yaqin-yaqingacha bu manzil transportlar borishi qiyin, kommunikatsiya tarmoqlari kamchil joy edi. O‘tgan yili bu yer “Obod mahalla” dasturiga kiritilib, keng ko‘lamli qurilish va obodonlashtirish ishlari olib borildi. Yo‘l, elektr energiyasi, ichimlik suvi hamda gaz tarmoqlari yangilandi.

Mahalla binosi yangidan qurilib, uning atrofida bolalar maydonchalari, tibbiyot punkti, tadbirkorlikka ko‘maklashuvchi markaz, savdo shoxobchasi tashkil etildi. Zamonaviy sport majmuasi qurib bitkazilmoqda. Prezidentimiz Qoraqalpog‘istonga tashrifi chog‘ida ushbu mahallada ham bo‘lib, aholi bilan dildan suhbatlashdi.

Muxtasar aytganda, bugun bu o‘lkada o‘zgarishlar, yangilanishlar katta. Islohotlar kirib bormagan soha yoki tarmoq qolmadi, hisob. Buning natijalari barcha tumanlarda, mahallalarda ko‘rinmoqda. Davlatimiz rahbarining tashrifi esa xalqimizni baxt-saodatning oydin yo‘liga chorlab, buyuk kelajakka bo‘lgan yuksak ishonchini yanada mustahkamladi.

Zuxra IBRAGIMOVA,
Oliy Majlis Qonunchilik palatasi
Spikeri o‘rinbosari,
“Adolat” SDP fraksiyasi rahbari