Qonun loyihasi “Adolat”SDP g‘oyalariga hamohang

Bolalar hayotimiz davomchilari, insoniyat hayotining mohiyati. Ertamiz egalarining huquqlarini himoya qilish, ularni jismonan sog‘lom, aqlan yetuk qilib tarbiyalash nafaqat davlat va jamiyat, balki barchamizning burchimiz sanaladi.

Shu bois, mamlakatimizda bola huquqlari qonuniy asosda to‘la himoyalangan. Ularning bo‘sh vaqtlarini mazmunli o‘tkazish uchun qulay shart-sharoit yaratish, qiziqishlari bo‘yicha to‘g‘ri yo‘naltirish, yosh avlodni milliy va umuminsoniy qadriyatlar ruhida tarbiyalash masalasi davlat siyosati darajasiga ko‘tarildi.

Ammo amaldagi qonun hujjatlarida “voyaga yetmaganlar ishlari bo‘yicha idoralararo komissiyalar” tushunchasi ishlatib kelinmoqda. Bu esa yangi tashkil etilgan Bolalar masalalari bo‘yicha komissiyalar tomonidan o‘z zimmasiga yuklatilgan vazifalarni qonunchilik asosida to‘liq amalga oshirishda hamda huquqni qo‘llash amaliyotida tushunmovchiliklarni keltirib chiqaryapti.

Oliy Majlis Qonunchilik palatasidagi “Adolat” SDP fraksiyasining navbatdagi yig‘ilishida ko‘rib chiqilgan qonun loyihasida bola huquqlari, erkinliklari va qonuniy manfaatlarini himoya qilishga doir yangiliklar aks etayotgani e’tiborga molik.

Deputatlar tomonidan ikkinchi o‘qishda muhokama qilingan —“Bolalar masalalari bo‘yicha komissiyalar tashkil etilganligi munosabati bilan O‘zbekiston Respublikasining ayrim qonun hujjatlariga o‘zgartishlar kiritish to‘g‘risida”gi qonun loyihasi “Adolat” SDP g‘oyalariga to‘la hamohangdir.

Muhokamalar davomida fraksiya a’zolari tomonidan qonun loyihasi yuzasidan bir qator takliflar berildi. Inson huquqlari, mamlakat kelajagining asosi hisoblangan bola huquqlari masalasi bitta yoki ikkita muassasa faoliyati sa’y-harakati bilangina ta’minlanib qolmasligi qayd etildi.

Fraksiya a’zolarining aytishicha, mamlakat ertasining bugunidan yaxshiroq bo‘lishi uchun barcha birdek harakat qilishi, inson huquqlarini ta’minlash, avvalo, bola huquqlarini ta’minlashdan boshlanishini to‘liq anglamog‘i lozim.

Taklif etilayotgan ushbu qonun loyihasining qabul qilinishi shubhasiz, bolalar masalalari bo‘yicha komissiyalar faoliyatining huquqiy asoslarini mustahkamlashga va ular faoliyatini samarali tashkil etishga xizmat qiladi.

Qizg‘in baxs-munozaralar, savol-javob va tortishuvlardan so‘ng, deputatlar qonun loyihasining zarurati va muhimligini hisobga olib, uni qo‘llab-quvvatladi.

Yig‘ilishda fraksiya vakolatiga taalluqli boshqa masalalar ham ko‘rib chiqildi.