Rasmiy daromadi yetarli boʻlmagan fuqarolar ham ipoteka krediti olish imkoniyatiga ega boʻladi

Rasmiy daromadi yetarli boʻlmagan fuqarolar ham ipoteka krediti olish imkoniyatiga ega boʻladi

Aholining uy-joyga boʻlgan talabini qondirish maqsadida 2023-yilgi Davlat dasturi doirasida “Yangi Oʻzbekiston” massivlari va 161 ta boshqa massivlarda, jumladan, xususiy pudrat tashkilotlari tomonidan yangi uy-joylar qurishning yillik hajmlarini 1,6 baravarga oshirib, 90 mingga yetkazish belgilangan.

Xususan, yangidan qurilgan uy-joylarni 32 ming nafar fuqaroga bozor tamoyillariga asoslangan ipoteka kreditlari tartibida, shuningdek, 11 ming nafar fuqaroga boshlangʻich badal va foiz toʻlovlarining bir qismini qoplashga subsidiyalar ajratish uchun davlat byudjetidan yetarli mablagʻlarni yoʻnaltirish orqali ajratish koʻzda tutilgan. Shuningdek, aholini bozor tamoyillari asosida ipoteka kreditlari orqali uy-joy bilan taʼminlashning yangi tartibi doirasida mulk huquqi asosida uy-joyga ega boʻlmagan fuqarolar uchun Toshkent viloyatida tajriba-sinov tariqasida “Mening birinchi uyim” dasturi amalga oshirilishi belgilangan edi.

Kuni kecha davlatimiz rahbari boshchiligida oʻtkazilgan videoselektor yigʻilishida yangi uy-joylar qurilishi va 2023-yilgi ipoteka dasturi boʻyicha olib borilayotgan ustuvor vazifalar muhokama qilinib, galdagi vazifalar belgilab olindi.

Xususan, yigʻilishda 2017-yildan buyon 326 mingta yangi uy-joylar foydalanishga topshirilgani, bu davrda uy-joy bilan taʼminlash darajasi aholi jon boshiga 18 foizga oshganligi taʼkidlandi. Shu bilan birga, soʻnggi uch yilda banklar tomonidan 210 ming oilaga 33 trillion soʻmlik ipoteka kreditlari ajratilgan. Ehtiyojmand 73 ming oilaga boshlangʻich badal va foiz toʻlovlari uchun 1,3 trillion soʻm subsidiya berilgan.

Yigʻilishda bu borada boshlangan ishlarni samarali davom ettirish maqsadida aholi va quruvchilar uchun 4 ta yoʻnalishda yangi yengillik va imkoniyatlar yaratib berilishi maʼlum qilindi. Xususan, koʻproq aholini uy-joy olish imkoniyati bilan qamrab olish maqsadida joriy yil 1-maydan boshlab, rasmiy daromadi yetarli boʻlmagan aholiga ham ipoteka krediti olish imkoni yaratiladi. Bunda ularning toʻlov qobiliyatini aniqlashda bank kartasidagi aylanma, ijara, kommunal va boshqa xarajatlarga toʻlangan pullari ham hisobga olinadi. Dastlabki badalni koʻproq toʻlagan fuqarolar esa, bankdan arzonroq kredit olish imkoniyatiga ega boʻladi.

Bunday tizimning joriy qilinishi yana minglab oilalar uchun Vatan ichra Vatan boʻlmish oʻz xonadonlariga ega boʻlish imkonini beradi. Aholini arzon uy-joylar bilan taʼminlashga qaratilgan yana bir muhim loyiha bu – “Mening birinchi uyim” dasturidir. Ushbu dasturni amalga oshirish uchun Toshkent viloyatining Zangiota tumanida 36 gektar yer maydonida 58 ta koʻp qavatli uy, ijtimoiy muassasalar, koʻngilochar maskanlar quriladi.

Shuningdek, qurilish tannarxini pasaytirish uchun yogʻoch, fanera, yogʻochli opalubka va oynani import qilishda 2025 yilga qadar bojxona boji bekor qilinadi. Yuqori markali sement boʻyicha bojxona boji imtiyozi yana 1 yilga uzaytiriladi. Buning hisobiga uy-joy qurish tannarxi yana 5 foizgacha pasayadi.

Albatta, aholining uy-joyga boʻlgan talabini qondirishda qurib foydalanishga topshirilayotgan uylarning sifati ham muhim sanaladi. Ayniqsa, soʻnggi oylarda dunyoda hamda mintaqamizda kuzatilayotgan seysmik faollik bu boradagi sergaklikni yanada oshirishni taqozo etmoqda.

Endilikda, yangidan barpo etilayotgan uylarni sifatini nazorat qilishga ham alohida eʼtibor qaratiladi. Shu bilan birga, yangi massivlardagi muammolardan biri – parkovkalar masalasi ham hal etiladi. Bunda, uy-joy hamda ijtimoiy va savdo obyektlarini loyihalashtirish va qurishda avtotransport vositalarining turargohlari, shu jumladan, koʻp qavatli va yerosti avtoturargohlar majburiy ravishda barpo etilishi taʼminlanadi.

Xulosa qilib aytganda, yil yakuniga borib yuz mingga yaqin oila oʻz kelajagini yangi va zamonaviy xonadonlarda rejalashtirish imkoniga ega boʻladi. Bu oʻz navbatida, fuqarolarimizda bugungi islohotlardan mamnunlik hissi shakllanishiga, mamlakatimizning ertangi taraqqiyotiga nisbatan daxldorlik hissi ortishiga olib keladi.

Muzaffara ABDIYEVA,
Oliy Majlis Qonunchilik palatasi deputati.