Referendum – davlat va xalq oʻrtasidagi eng muhim jarayon

Oliy Majlis Qonunchilik palatasi deputati Muhammadjon Valiyev tomonidan Qoʻqon universiteti, hokimligi, shahar tibbiyot kolleji majlislar zalida konstitutsiyaviy islohotlar mazmun-mohiyatiga bagʻishlangan targʻibot tadbirlari oʻtkazildi.

Taʼkidlanganidek, Oliy Majlis Qonunchilik Palatasining 10-mart kungi yalpi majlisida Oʻzbekiston Respublikasining yangi tahrirdagi Konstitutsiyasi toʻgʻrisidagi qonun qabul qilindi. Qonun 30-aprel, yakshanba kuni boʻlib oʻtadigan umumxalq referendumida ovozga qoʻyiladi. Bevosita demokratiyaning muhim vositasi hisoblangan referendum umumxalq ovoz berish yoʻli bilan qonunlar qabul qilish va davlat ahamiyatiga molik eng muhim masalalarni hal qilish shaklidir.

Joriy yilning 30-aprelida boʻlib oʻtadigan referendum byulletenida: “Siz Oʻzbekiston Respublikasi Konstitutsiyasi toʻgʻrisidagi Oʻzbekiston Respublikasi konstitutsiyaviy qonunini qabul qilasizmi?” deb yoziladi.

Ahamiyatli tomoni shundaki, Oʻzbekiston Respublikasi Konstitutsiyasini referendum oʻtkazish yoʻli bilan qabul qilish mamlakatimiz tarixida birinchi marta amalga oshirilmoqda. Baxtimiz qomusini qabul qilish xalqning irodasiga havola etilgani esa xalq davlat hokimiyatining birdan bir manbai ekanligining namunasidir.

Soʻnggi olti yilda erishgan yutuqlarimizni, xususan, iqtisodiyot, inson huquqlari, odil sudlov, soʻz va eʼtiqod erkinligi, ijtimoiy himoya sohalaridagi yuzlab cheklovlarning olib tashlangani, naqd pul, valyuta, kredit masalalaridagi muammolar hal qilinganining konstitutsiyaviy himoyasini taʼminlash zarur. Bu yutuqlar, huquq va erkinliklardan nafaqat hozirgi, balki kelajak avlodlarimiz ham emin-erkin foydalanishi uchun, albatta, ular bosh qomusimizda oʻz ifodasini topmoqda, – deydi deputat.

Tadbirlar davomida ishtirokchilar oʻzlarini qiziqtirgan savollar yuzasidan javob olishdi.

“Adolat” SDP Fargʻona viloyat Kengashi Matbuot xizmati.